अदालतदेखि सडकसम्म अध्यागमन एजेन्ट सक्रिय, सिकागोमा आप्रवासीमाथि कडा निगरानी
फोटो: होमल्याण्ड सेक्युरिटी
सिकागोका विभिन्न क्षेत्र र आसपासका उपनगरहरूमा पछिल्लो समय अध्यागमन एजेन्टहरूले चलाउने पहिचान नखुलेका गाडीहरू आउन थालेपछि स्थानीय आप्रवासी समुदायमा फेरि त्रास फैलिएको छ । एजेन्टहरू आउँदा स्थानीय बासिन्दाहरूले एकअर्कालाई सचेत गराउन सिट्ठी फुक्ने गरेका छन् ।
सामाजिक सञ्जालहरूमा भाइरल भइरहेका भिडियोहरूमा आइसका एजेन्टहरूले ट्राफिक चेकिङका क्रममा र अदालत बाहिरैबाट मानिसहरूलाई हिरासतमा लिइरहेको देखेपछि स्थानीय जनप्रतिनिधि र आप्रवासीहरूले गम्भीर चिन्ता व्यक्त गरेका छन् ।
अध्यागमन विज्ञहरूका अनुसार डिपार्टमेन्ट अफ होमल्यान्ड सेकुरिटीले गत वर्षको ‘अपरेशन मिडवे ब्लिट्ज’ पछि आफ्नो रणनीति परिवर्तन गरेको छ । अध्यागमन अदालतको सुनुवाइ, नियमित हाजिरी र फौजदारी अदालत बाहिरबाटै मानिसहरू समातिने क्रम ह्वात्तै बढेको छ । सामान्य आरोप लागेका वा मुद्दाको किनारा नलागेका व्यक्तिहरूलाई समेत पक्राउ गरिएको छ । यसका साथै बाइडेन प्रशासनको समयमा विशेष ‘पेरोल प्रोग्राम’ मार्फत अमेरिका प्रवेश गरेका आप्रवासीहरू पनि यो धरपकडको निसानामा परेका छन् ।
हालै कुक काउन्टीको ब्रिजभ्यु अदालत बाहिर एक युवा भेनेजुएलाली नागरिक डेनी गेब्रियल पेरेज ओस्पिनोलाई खुद्रा चोरीको सामान्य आरोपमा अदालत पुगेर फर्किँदै गर्दा आइस एजेन्टहरूले भुइँमा पछारेर पक्राउ गरे । सोही दिन एक भेनेजुएलाली आमा र उनका बच्चालाई पनि अदालतबाटै हिरासतमा लिइयो । राज्यको कानुनले अदालत परिसरभित्र बिना वारेन्ट पक्राउ गर्न निषेध गरे तापनि एजेन्टहरूले वारेन्ट देखाउन अस्वीकार गरेका थिए ।
यस विषयमा होमल्यान्ड सेकुरिटीका प्रवक्ताले एजेन्टहरूले संघीय कानुनको पालना गराउँदै सार्वजनिक सुरक्षामा खतरा पुर्याउने ‘आपराधिक पृष्ठभूमि’ भएकाहरूलाई हटाउन केन्द्रित रहेको दाबी गरे ।
अदालत बाहिरको पक्राउ मात्र नभई आप्रवासी अदालतभित्र पनि नयाँ र कडा नियमहरू लागू गरिएका छन् । सिकागो र इन्डियानापोलिस जस्ता सहरहरूमा अचेल “मेगा मास्टर” भनिने आम सुनुवाइहरू भइरहेका छन् । यस अन्तर्गत एकै पटक ३० देखि १०० जनासम्म आप्रवासीहरूलाई एउटै न्यायाधीशका अगाडि उभ्याइन्छ, जसमा धेरैजसोको त वकिल समेत हुँदैनन् ।
कानुनी अधिवक्ताहरूका अनुसार अदालतले आप्रवासीहरूलाई ‘रेस्पोन्डेन्ट प्लीडिङ डिक्लेरेशन’ जस्ता फारमहरू भर्न लगाउने गरेको छ । भाषा र कानुनी जटिलताका कारण फारममा सानो गल्ती हुँदा वा नबुझी हस्ताक्षर गर्दा आप्रवासीहरूले आफ्ना कानुनी अधिकारहरू गुमाउने र देश निकालाको प्रक्रिया झन् छिटो हुने खतरा बढेको छ । कतिपय अवस्थामा त ढिलो सूचना पाएकै कारण अदालतमा उपस्थित हुन नसक्दा मानिसहरूलाई उनीहरूको अनुपस्थितिमै देश निकालाको आदेश सुनाउने गरिएको छ ।
अध्यागमन एजेन्टहरूको सक्रियता अदालतमा मात्र सीमित छैन । पछिल्लो महिना सिकागो क्षेत्रमा आप्रवासीहरूलाई लखेट्ने क्रममा दुईवटा ठूला गाडी दुर्घटनाहरू समेत भएका छन् । जुन ९ मा उत्तर-पश्चिम क्षेत्रको एक शान्त सडकमा पोल्याण्डका एक नागरिकलाई लखेट्ने क्रममा उनको गाडी रुखमा ठोक्किएको थियो । त्यस्तै, जुन २ मा अल्बानी पार्कमा एउटा नागरिकको गाडीसँग ठोक्काएर एक भेनेजुएलाली नागरिकलाई पक्राउ गर्दा स्थानीय बासिन्दाहरूले विरोध जनाएका थिए ।
अल्बानी पार्ककी काउन्सिलर रोजाना रोड्रिगेजले भनिन्, पहिलेको अपरेसनमा एजेन्टहरूले नाम समेत नसोध्ती जो पायो त्यसलाई समात्थे । अहिले अदालतको रेकर्ड हेरेर निश्चित व्यक्तिहरूलाई मात्र पछ्याए जस्तो देखिन्छ । तर उनीहरूले आवासीय क्षेत्रमा जसरी तीव्र गतिमा गाडी कुदाउँछन्, त्यसले स्थानीयमा पुरानो डर फेरि ब्युँताइदिएको छ ।
ब्रोडभ्यूस्थित आइसको प्रोसेसिङ सेन्टरमा अचेल गाडीहरूको आवतजावत र थुनुवाहरूको स्थानान्तरण निकै बढेको छ । मेक्सिकन वाणिज्य दूतावासकी राजदूत रेयना टोरेस मेन्डिभिलका अनुसार जनवरी २०२५ देखि अप्रिल २०२६ सम्ममा करिब ३,३६० मेक्सिकन नागरिकहरूलाई हिरासतमा राखिएको पहिचान भएको छ । उनले भनिन्, हामीले अन्तर्वार्ता लिएका मानिसहरूमध्ये झन्डै आधा जतिको कुनै पनि आपराधिक इतिहास छैन ।
यसै वर्ष धार्मिक संस्थाहरूले अदालतमा मुद्दा जितेपछि पादरीहरूलाई ब्रोडभ्यू हिरासत केन्द्रमा दैनिक रूपमा प्रार्थना र काउन्सिलिङका लागि जान अनुमति दिइएको छ । त्यहाँ पुग्ने पादरीहरूका अनुसार हिरासत केन्द्र व्यवस्थित र सफा भए तापनि त्यहाँ थुनिएकाहरू कोही पनि ‘घोर अपराधी’ नभएर सामान्य मानिसहरू हुन्, जो आफ्नो भविष्य सुरक्षित गर्न कानुनी लडाइँ लडिरहेका छन् ।
