कठोर बन्दै अमेरिकी अध्यागमन प्रणाली: कानुनी सुरक्षा खोज्ने नाबालिगहरू मारमा
Photo: Sasun Bughdaryan/Unsplash
ट्रम्प प्रशासनको दोस्रो कार्यकाल सुरु भएसँगै संयुक्त राज्य अमेरिकामा आप्रवासीहरू,विशेष गरी एक्लै आएका नाबालिग बालबालिका र किशोरहरूलाई देश निकाला गर्ने प्रक्रियामा निकै तीव्रता दिइएको छ । न्युयोर्कस्थित अध्यागमन अदालतहरूमा भर्चुअल माध्यमबाट हतार-हतार सुनुवाइ गर्दै एकै घण्टामा दर्जनौँ किशोरहरूलाई देश निकाला गर्ने आदेश दिइने गरेको पाइएको छ ।
अध्यागमन अधिकारीहरूका अनुसार, ‘विशेष आप्रवासी युवा’ भिसा र शरणार्थीका लागि आवेदन दिएका हजारौँ बालबालिकाहरू अहिले कानुनी अन्योलमा परेका छन् । विगतमा यस्ता संवेदनशील मामिलाहरूमा बालबालिकाहरूलाई कानुनी प्रक्रिया पूरा नभएसम्म अमेरिकामा बस्ने अनुमति दिइने गरे तापनि, हालैका नयाँ निर्देशिकाहरूले गर्दा उनीहरूको मुद्दालाई ठाडै खारेज गरिँदै छ ।
जस्टिस डिपार्टमेन्टले मुद्दाहरूको छिटो फर्स्योट गर्न दबाब दिएका कारण न्यायाधीशहरूले कानुनी सल्लाहकार बिना नै बालबालिकाहरूको सुनुवाइ गरिरहेका छन् । कतिपय अवस्थामा भाषा अनुवादकको अधिकार समेत त्याग्न लगाएर प्रक्रियालाई हतारमा टुङ्ग्याइने गरिएको छ । यसैबीच, प्रशासनको नीतिसँग असहमत हुने र आप्रवासीप्रति केही नरम दृष्टिकोण राख्ने करिब २०० जना अनुभवी अध्यागमन न्यायाधीशहरूलाई सेवाबाट हटाइएको वा राजीनामा दिन बाध्य पारिएको छ ।
मानवाधिकारवादी र आप्रवासीका पक्षमा वकालत गर्ने वकिलहरूले यस कदमको कडा आलोचना गरेका छन् । उनीहरूका अनुसार, घरेलु हिंसा र दुर्व्यवहारबाट जोगिन एक्लै अमेरिका आइपुगेका बालबालिकाहरूलाई पर्याप्त कानुनी प्रतिरक्षाको मौका समेत नदिई फिर्ता पठाउनु मानव अधिकार र ‘ड्यू प्रोसेस’को घोर उल्लङ्घन हो । यद्यपि, सरकारले भने अमेरिकी नागरिकहरूको हित र कानुनी प्रणालीको प्रभावकारिताका लागि यो कदम आवश्यक रहेको दाबी गरेको छ ।
