आप्रवासनको जोखिमपूर्ण यात्रा : एक वर्षमै ८ हजारको मृत्यु, युरोप जाने मार्ग सबैभन्दा घातक
गत वर्ष विश्वभरका विभिन्न आप्रवासन मार्गहरूमा झण्डै ८ हजार मानिसको मृत्यु भएको वा बेपत्ता भएको तथ्य सार्वजनिक भएको छ। अन्तर्राष्ट्रिय आप्रवासन संगठन (आईओएम)ले मंगलबार सार्वजनिक गरेको नयाँ प्रतिवेदनअनुसार सन् २०२५ मा कम्तीमा ७,९०४ जनाले ज्यान गुमाएका छन् ।
यो संख्या अघिल्लो वर्ष सन् २०२४ मा रहेको ९,१९७ भन्दा कम भए पनि वास्तविक क्षति अझ धेरै हुन सक्ने आईओएमले चेतावनी दिएको छ। संस्थाका अनुसार सहायता कटौतीका कारण करिब १,५०० संदिग्ध घटनाहरूको पुष्टि हुन नसक्दा आधिकारिक तथ्यांक कम देखिएको हो।
आईओएमकी मानवीय सहायता तथा प्रतिकार्य विभागकी निर्देशक मारिया मोइताले जेनेभामा आयोजित पत्रकार सम्मेलनमा भनिन्, “यी तथ्यांकहरूले यस्ता त्रासदीहरू रोक्न हामी सामूहिक रूपमा असफल भएको स्पष्ट देखाउँछ।”
प्रतिवेदनअनुसार युरोप पुग्न प्रयोग हुने समुद्री मार्गहरू सबैभन्दा घातक बनेका छन्। कुल मृत्यु तथा बेपत्तामध्ये १० जनामा ४ जनाभन्दा बढी यिनै मार्गमा परेको देखिन्छ। धेरै घटनामा डुङ्गा पूर्ण रूपमा हराउने र कहिल्यै फेला नपर्ने “अदृश्य जहाज दुर्घटना”का कारण वास्तविक मृतक संख्या अझै बढी हुन सक्ने उल्लेख गरिएको छ।
आईओएमका महानिर्देशक एमी पोपका अनुसार विश्वभर द्वन्द्व, जलवायु परिवर्तनको प्रभाव र कडा आप्रवासन नीतिका कारण मानिसहरू जोखिमपूर्ण वैकल्पिक मार्ग रोज्न बाध्य भएका छन्। “मार्ग परिवर्तन भए पनि जोखिम भने घटेको छैन,” उनले भनिन्।
क्षेत्रगत रूपमा हेर्दा पश्चिम अफ्रिकाबाट उत्तरतर्फ जाने मार्गमा मात्रै करिब १,२०० जनाको मृत्यु भएको छ। त्यस्तै एसियामा म्यानमारमा जारी हिंसा र बंगलादेशका शरणार्थी शिविरबाट भाग्ने रोहिंग्या समुदायका कारण मृत्यु हुनेको संख्या बढ्दो देखिएको छ।
आईओएमले यी तथ्यांकहरू केवल संख्या मात्र नभई जोखिमपूर्ण यात्रामा निस्किएका मानिसहरूको पीडा र घर फर्किने आशामा कुर्दै बसेका परिवारहरूको वियोगको कथा पनि भएको जनाएको छ।