ट्रम्प भन्छन्: मिनियापोलिसका मृत्यु दुःखद, ‘आइस’ले अब नरम व्यवहार अपनाउने
प्रकाशित मिति : माघ २१, २०८२ बुधबार
फोटो : एपी/ रासस
अमेरिकामा आप्रवासन एजेन्टहरूको व्यवहार अब नरम हुने देखिएको छ। राष्ट्रपति डोनाल्ड ट्रम्पले आप्रवासन एजेन्टहरूले अब “अलि नरम व्यवहार” अपनाउन सक्ने बताएका हुन्।
मिनेसोटामा संघीय आप्रवासन अधिकारीहरूसँग भएको झडपमा गत महिना दुई अमेरिकी नागरिकको मृत्यु भएपछि बढेको तनावका बीच ट्रम्पको पछिल्लो धारणा बाहिर आएको हो। ट्रम्प प्रशासनले त्यहाँ तैनाथ करिब एक-चौथाइ संघीय आप्रवासन बल फिर्ता लिन थालेको छ।
ट्रम्पले आफ्नो राजनीतिक रूपमा संवेदनशील मुद्दामा दुर्लभ रूपमा मेलमिलापपूर्ण स्वर अपनाउँदै भने, “मैले सिकेँ कि सायद हामी अलि नरम हुन सक्छौँ। तर तपाईं अझै कडा हुनैपर्छ।” ट्रम्पले आफ्नो प्रशासनका कारबाहीहरू अपराधीहरूलाई लक्षित गरी गरिएको दाबी गरे। उनले भने, “हामी पूर्ण रूपमा अपराधीहरूमा केन्द्रित छौँ।”
ट्रम्पले मिनियापोलिसमा एलेक्स प्रेट्टी र रेनी गुडको गोली हानी मृत्यु भएको घटनाप्रति आफू “खुसी नभएको” पनि बताए। उनले भने, “उनी देवदूत थिएनन्, र उनी पनि देवदूत थिइनन्। पहिलेका केही भिडियोहरू हेर्नुहोस्, तर त्यसो हुँदाहुँदै पनि म त्यहाँ जे भयो, त्यसबाट खुसी छैन।”
दुई अमेरिकी नागरिकको मृत्यु जायज थियो कि थिएन भनेर सोधिएको प्रश्नमा ट्रम्पले भने, “होइन, यस्तो हुनु हुँदैनथ्यो। यो मलाई धेरै दुःखद लाग्यो। दुवै घटना निकै दुःखद थिए।”
अमेरिकी “बोर्डर संयोजक” टम होमनले यसअघि मिनियापोलिस क्षेत्रबाट ७०० संघीय आप्रवासन एजेन्ट फिर्ता बोलाइने बताएका थिए। उनका अनुसार २,००० एजेन्ट भने अझै त्यहाँ रहनेछन्।
होमनले मिनियापोलिसमा कार्यरत सबै अधिकारीहरूलाई ‘बडी-वर्न क्यामेरा’ (शरीरमा जडान गरिने क्यामेरा) उपलब्ध गराउने कामलाई सरकारले प्राथमिकतामा राखेको बताएका छन्। उनले देशभरका एजेन्टहरूमा पनि यो उपकरण विस्तार गर्ने योजना रहेको बताए।
होमनका अनुसार मिनेसोटामा संघीय आप्रवासन एजेन्टहरूले धेरै “खराब मानिसहरू” पक्राउ गरेका छन्। जसमा १४ जना हत्या अभियोगमा, १३९ जना आक्रमणमा, ८७ जना यौन अपराधमा र २८ जना गिरोहका सदस्य रहेको बताइएको छ।
मिनेसोटाका डेमोक्र्याट गभर्नर टिम वाल्जले संघीय बल फिर्ता गर्ने निर्णयलाई स्वागत गरे पनि अझै थप कदम आवश्यक रहेको बताएका छन्।