इलिनोय राज्यमा नेशनल गार्ड तैनाथ गर्ने ट्रम्प प्रशासनको अनुरोध अपिल अदालतद्वारा अस्वीकार
प्रकाशित मिति : आश्विन ३०, २०८२ शुक्रबार
अमेरिकाको एक संघीय अपिल अदालतले राष्ट्रपति डोनाल्ड ट्रम्प प्रशासनको अनुरोध अस्वीकार गर्दै इलिनोय राज्यमा नेशनल गार्ड पठाउने सरकारको योजना अस्थायी रूपमा रोक्ने तल्लो अदालतको आदेशलाई यथावत् राख्ने निर्णय गरेको छ।
यो आदेश अमेरिकी जिल्ला न्यायाधीश एप्रिल पेरीले अक्टोबर ९ मा शिकागोमा जारी गरेकी थिइन्। उक्त आदेशले नेशनल गार्डको तैनाथी तत्कालका लागि रोकेको थियो।
शिकागोस्थित ७औं अमेरिकी सर्किट अपिल अदालतका तीन न्यायाधीशहरूको प्यानलले भनेको छ – “फेडेरल अधिकारीहरूले आप्रवासन कानून कार्यान्वयन गर्न नसकेको कुनै प्रमाण प्रस्तुत गरिएको छैन।”
राष्ट्रपति डोनाल्ड ट्रम्पले इलिनोयमा नेशनल गार्ड पठाउने निर्णय लिएका थिए । उनले फेडेरल अधिकारीहरूले कागजातबिना बसोबास गरेका व्यक्तिहरूलाई पक्राउ गर्ने क्रममा हिंसात्मक प्रदर्शनहरूको सामना गर्नुपरेको दाबी गरेका थिए ।
तर, अदालतले भने इलिनोयको संवैधानिक सार्वभौमिकता अधिकारको उल्लङ्घन भएको देखिएको बताउँदै उक्त कदम कानूनी रूपमा प्रश्न उठ्ने खालको रहेको ठहर गरेको छ। अदालतले टेक्सास राष्ट्रिय गार्डका सैनिकहरूलाई इलिनोयमा पठाइनुबाट परिस्थिति अझ जटिल भएको समेत जनाएको छ।
यद्यपि, अदालतले न्यायाधीश पेरीको आदेशको एक भाग स्थगित गरेको छ, जसले इलिनोय नेशनल गार्डलाई फेडेरल नियन्त्रण अन्तर्गत रहन अनुमति दिएको छ। अदालतका अनुसार यो निर्णयले हालका लागि राज्यलाई न्यून क्षति पुर्याउनेछ।
ह्वाइट हाउसकी प्रवक्ता अबिगेल ज्याक्सनले विज्ञप्ति जारी गर्दै भनिन्, “राष्ट्रपति ट्रम्पले फेडेरल अधिकारीहरू र सम्पत्तिको सुरक्षा गर्न आफ्नो वैधानिक अधिकार प्रयोग गरेका हुन्। उनी अमेरिकी सहरहरूमा फैलिएको अव्यवस्थातर्फ आँखा चिम्म पार्ने छैनन् । हामी उच्च अदालतबाट न्याय पाउनेमा विश्वास गर्छौं।”
इलिनोयका अटर्नी जनरल क्वामे राउलको कार्यालयले भने अदालतको निर्णयबारे तत्काल कुनै प्रतिक्रिया जनाएको छैन।