आगामी दुई साताभित्र युक्रेन युद्ध अन्त्यमा कुनै प्रगति नभए कडा निर्णय लिने ट्रम्पको चेतावनी
प्रकाशित मिति : ७ भदौ २०८२, शनिबार
अमेरिकी राष्ट्रपति डोनाल्ड ट्रम्पले आगामी दुई साताभित्र युक्रेन युद्धको शान्तिपूर्ण समाधानका लागि ठोस प्रगति नभए कडा निर्णय लिन बाध्य हुने चेतावनी दिएका छन् । उनले रूसमाथि कडा प्रतिबन्ध वा आयात शुल्क (ट्यारिफ) बढाउने चेतावनी दिएका हुन् ।
ट्रम्पको यो चेतावनी १५ अगस्टमा अलास्कामा रूसी राष्ट्रपति भ्लादिमिर पुटिनसँग भएको उच्चस्तरीय भेटवार्तापछि आएको हो।
अलास्कामा भएको शिखर वार्तामा युद्धविरामबारे छलफल भए पनि रूस र युक्रेनबीच कुनै सहमति जुट्न सकेन। यसपछि अमेरिकी प्रशासनले रूसविरुद्ध थप दबाब दिने संकेत दिएको छ।
ह्वाइट हाउसमा पत्रकारहरूसँग कुरा गर्दै ट्रम्पले भने, “म चाँडै निर्णय गर्न लागेको छु। यो धेरै महत्वपूर्ण हुनेछ, चाहे ठूलो स्तरका प्रतिबन्ध हुन्, ट्यारिफ हुन् वा दुवै। वा हामी यसलाई पनि भन्न सक्छौं, यो अमेरिकाको होइन, तपाईंहरूको लडाइँ हो।”
ट्रम्पले हालै युक्रेनमा एक अमेरिकी कारखानामाथि भएको रूसी आक्रमणप्रति आक्रोश प्रकट गरे। उक्त आक्रमणबाट कारखानामा आगलागी भएको थियो र धेरै कामदार घाइते भएका थिए।
“म यसबाट खुशी छैन र युद्धसँग सम्बन्धित कुनै पनि कुराबाट पनि खुशी छैन,” ट्रम्पले भने।
ट्रम्पले रूसी राष्ट्रपति पुटिन र युक्रेनी राष्ट्रपति भोलोदिमिर जेलेन्स्कीबीच प्रत्यक्ष भेटवार्ता हुनु पर्नेमा जोड दिए।
उनले भने, “म चाहन्छु कि दुवै नेताहरू एउटै टेबुलमा बसून्। यदि उनीहरूले त्यस्तो गरेनन् भने, त्यसको कारण बुझ्नैपर्छ।”
ट्रम्पले आफ्नो कार्यकालमा सात युद्ध रोकिएको र तीन सम्भावित युद्धलाई टारिएको दाबी पनि गरे।
यसअघि, १८ अगस्टमा राष्ट्रपति जेलेन्स्की युरोपेली नेताहरूसँग ह्वाइट हाउस पुगेका थिए। त्यहाँ युद्ध अन्त्य गर्ने प्रयासबारे छलफल भएको थियो।
जेलेन्स्कीसँगको भेटपछि ट्रम्पले पुटिन–जेलेन्स्की प्रत्यक्ष बैठकको तयारी सुरु भइसकेको बताएका थिए।
ओभल अफिसमा पत्रकारहरूसँग कुरा गर्दै ट्रम्पले भने, “रूस–युक्रेन युद्ध कुन दिशातर्फ बढ्छ भन्ने कुरा अर्को दुई साताभित्र प्रष्ट हुनेछ।”