ह्वाइट हाउस अब टिकटकमा, ट्रम्पले भने – ‘आइ एम योर भ्वाइस’
प्रकाशित मिति : ४ भदौ २०८२, बुधबार
ह्वाइट हाउसले आधिकारिक रूपमा टिकटक एकाउन्ट सुरु गरेको छ। राष्ट्रपति डोनाल्ड ट्रम्पको सन्देशलाई अमेरिकामा रहेका १७ करोडभन्दा बढी प्रयोगकर्तासम्म पुर्याउने लक्ष्यका साथ मंगलबारदेखि यो पहल गरिएको हो।
राष्ट्रपति ट्रम्पले यस लोकप्रिय छोटो भिडियो एप टिकटकप्रति विशेष रुचि देखाउँदै आएका छन्। उनले सन् २०२४ नोभेम्बरमा भएको राष्ट्रपति निर्वाचनमा डेमोक्र्याट उम्मेदवार कमला ह्यारिसलाई हराउँदा युवा मतदातामाझ टिकटकले ठूलो सहयोग गरेको श्रेय दिएका थिए।
तर, वाशिङ्टनका धेरै सांसदहरूले टिकटकको अमेरिकी प्रयोगकर्ताको डेटा चीन सरकारको हातमा पर्न सक्ने गम्भीर चिन्ता व्यक्त गरेका छन्। अघिल्ला गुप्तचर निकायहरूले पनि टिकटकको मातृ कम्पनी बाइटडान्स चीन सरकारको दबाबमा रहेको चेतावनी दिएका छन्। यसैकारण, ट्रम्प प्रशासन अमेरिकी लगानीकर्ताले एपको स्वामित्व लिन सक्ने गरी सम्झौतामा काम गरिरहेको छ।
ह्वाइट हाउसको आधिकारिक टिकटक खाता @whitehouse मंगलबार साँझदेखि सुरु गरिएको हो। पहिलो भिडियोमा राष्ट्रपति ट्रम्पको दृश्य देखाइएको थियो जहाँ उनले भनिरहेका छन् — “I am your voice.”
उक्त भिडियोको क्याप्शनमा लेखिएको थियो : “America we are BACK! What’s up TikTok?”
ट्रम्पले गत वर्षको चुनाव अभियानका क्रममा प्रयोग गरेको टिकटक खाता @realdonaldtrump मा हाल १ करोड ५० लाखभन्दा बढी फलोअर छन्। राष्ट्रपति ट्रम्प आफ्नो सन्देश जनतासम्म पुर्याउन मुख्यत : ट्रुथ सोसल प्लेटफर्ममा निर्भर रहन्छन् भने कहिलेकाहीँ एक्समा पनि सक्रिय हुन्छन्।
ह्वाइट हाउसकी प्रेस सेक्रेटरी क्यारोलिन लेभिटले भनिन् – “ट्रम्प प्रशासन राष्ट्रपति ट्रम्पले जनताका लागि दिलाएका ऐतिहासिक सफलताहरूलाई सकेसम्म धेरै श्रोतामाझ पुर्याउन कटिबद्ध छ। टिकटकमा ट्रम्पको सन्देश राष्ट्रपति अभियानका बेला प्रभावशाली बनेको थियो। अब हामी ती सफलताहरूलाई अझै बलियो बनाउँदै नयाँ शैलीमा जनतासँग संवाद गर्नेछौं।”
सन् २०२४ मा बनेको कानुनअनुसार टिकटकले यस वर्षको जनवरी १९ सम्ममा अमेरिकामा आफ्नो सम्पत्ति बिक्री नगरे वा त्यसतर्फ ठोस प्रगति देखाउन नसकेमा सञ्चालन बन्द गर्नुपर्ने थियो। तर, जनवरी २० मा दोस्रो कार्यकाल सुरु गरेपछि ट्रम्पले उक्त कानुन तत्काल लागू नगर्ने निर्णय गरे। उनले समयसीमा तीनपटक लम्ब्याउँदै अहिले सेप्टेम्बर १७ सम्म पुर्याएका छन्।
तर, यो कदमले कंग्रेसका केही सांसदहरूको आलोचना खेप्नुपरेको छ। उनीहरूले ट्रम्प प्रशासनले कानुनलाई बेवास्ता गरेको र टिकटकमा रहेको चिनियाँ नियन्त्रणसँग सम्बन्धित राष्ट्रिय सुरक्षा जोखिमलाई नजरअन्दाज गरेको आरोप लगाएका छन्।