इरानद्वारा यूरेनियम प्रशोधन पुनः सुरु गर्न सक्ने सम्भावना
प्रकाशित मिति : असार १५, २०८२ आईतबार
अन्तर्राष्ट्रिय आणविक ऊर्जा एजेन्सी का प्रमुख राफाएल ग्रोसी ले केही महिनाभित्रै इरानले यूरेनियम प्रशोधन पुनः सुरु गर्न सक्ने बताएका छन्।
अमेरिकी आक्रमणका बाबजुद इरानसँग अझै पनि आवश्यक औद्योगिक र प्राविधिक क्षमता रहेको उनको भनाइ छ। यसले इरान आणविक बम निर्माणको नजिक पुग्न सक्ने अधिकारीहरूको दाबीलाई बल पुर्याएको छ।
गत साता अमेरिकाले इरानका तीन आणविक साइटहरू, विशेष गरी फोर्डो, नतान्ज र इस्फहान मा बम खसालेको थियो।
यो आक्रमण इजरायलले जुन १३ मा गरेको आक्रमण पछि अमेरिकाले गरेको हो। इजरायलले इरान चाँडै आणविक बम निर्माणको नजिक पुगेको दाबी गर्दै आएको छ।
अमेरिकी राष्ट्रपति डोनाल्ड ट्रम्प ले इरानका आणविक केन्द्रहरू पूर्ण रूपमा ध्वस्त भएको दाबी गरे पनि IAEA प्रमुख ग्रोसीले ती साइटहरू पूर्ण रूपमा नष्ट नभएको स्पष्ट पारेका छन्।
यसअघि चुहिएको पेन्टागनको मूल्याङ्कन प्रतिवेदनमा पनि अमेरिकी आक्रमणले इरानको आणविक कार्यक्रमलाई केही महिना मात्र पछाडि धकेलेको उल्लेख थियो। इरानले पनि आक्रमणबाट भएको क्षतिका विषयमा विरोधाभासी सन्देशहरू दिइरहेको छ।
बिहीबार इरानका सर्वोच्च नेता आयतोल्ला अली खमेनी ले “प्रभावकारी क्षति केही पनि नभएको” बताएका थिए भने परराष्ट्रमन्त्री अब्बास अराघचीले “गम्भीर र अत्यधिक क्षति” भएको जानकारी दिएका छन्।
हाललाई इरान र इजरायल युद्धविराममा सहमत भएका छन्। तर, यदि इरानले फेरि यूरेनियम प्रशोधनको स्तर बढाएमा ट्रम्पले इरानमाथि पुनः आक्रमण गर्न पूर्ण रूपमा विचार गर्ने बताएका छन्। यसले मध्यपूर्वमा थप तनाव बढ्ने सम्भावना देखाएको छ।
यता, राजधानी तेहरान विस्तारै सामान्य अवस्थामा फर्किंदै भए पनि इरानका नागरिकहरू भने डर र अनिश्चिततामा बाँचिरहेका छन्।