अब प्रोफाइल ‘लक’ गर्नेको अमेरिकी भिसा अस्वीकृत हुनसक्ने, पब्लिक बनाउन दूतावासको सुझाव
प्रकाशित मिति : असार ११, २०८२ बुधबार
तस्वीर: च्याट जीपीटी/ एआईबाट निर्मित
कतै तपाईले आफ्नो फेसबुक एकाउन्ट लक गर्नुभएको त छैन ? वा ट्वीटर, टिकटक वा इन्स्टाग्राम लगायतका सामाजिक सञ्जालहरु फ्लोअर्सहरुलेमात्र देख्न पाउनेगरी प्राइभेट त गर्नुभएको छैन ? यदि तपाईका सामाजिक सञ्जालहरु प्राइभेट छन् ? यदि तपाईले ती सामाजिक सञ्जालहरु पब्लिक मोडमा नराखी अमेरिकाको भिसा आवेदन दिनुभएको खण्डमा अब तपाईको भिसा अस्वीकृत हुनसक्नेछ ।
अमेरिकी दूतावास काठमाडौंले आज एक सूचना जारी गर्दै आजैदेखि प्रभावकारी हुनेगरी विद्यार्थी भिसा एफ, एम वा जे गैर आप्रवासी श्रेणीका भिसाका लागि आवेदन दिने सबै व्यक्तिहरूलाई आफ्ना सबै व्यक्तिगत सामाजिक सञ्जाल खाताहरूको गोपनीयता सेटिङलाई ‘सार्वजनिकमा परिवर्तन अनुरोध गरेको छ । यसले पहिचान र अमेरिका प्रवेश योग्यता पुष्टि गर्न आवश्यक जाँच प्रक्रियालाई सहज बनाउने दूतावासको भनाई छ । साथै दूतावासले प्रत्येक भिसा निर्णय राष्ट्रिय सुरक्षासँग सम्बन्धित निर्णय भएको प्रष्ट पारेको छ ।
अमेरिकाले भिसा आवेदकको सामाजिक सञ्जाल जाँच कडा गर्ने नीति ल्याएसँगै अमेरिकी दूतावास काठमाडौंले पनि उक्त नीतिको कार्यान्वयन गरिरहेको छ । सामाजिक सञ्जालमा अमेरिकाले आतंकवादी सूचिमा राखेका संगठनहरुको समर्थन गरेमा वा त्यस्ता संगठनसँगको सम्बन्ध देखिने सामाग्रीहरु पोष्ट गरेमा ती भिसा आवेदकको अमेरिकाको भिसा अस्वीकृत गर्न ट्रम्प प्रशासनले दूतावासहरुलाई निर्देशन दिइसकेको छ । सामाजिक सञ्जालको नियमनका लागि केही समय विद्यार्थी भिसाका नयाँ अन्तरवार्ता अप्वाइन्टमेन्टहरु समेत स्थगित गरिएको थियो ।
अमेरिकाको विदेश मन्त्रालयले गत साता विद्यार्थी भिसाका विद्यार्थी भिसाका नयाँ अन्तरवार्ता अप्वाइन्टमेन्टहरु सुचारु गर्न निर्देशन दिएपनि यसका लागि सामाजिक सञ्जालसम्बन्धी कडा दिशानिर्देशहरू लागू गरेको छ । गत बुधबार दूतावास र कन्सुलेटहरूलाई दिइएको निर्देशनअनुसार यदि आवेदकले आफ्ना सामाजिक सञ्जाल एकाउन्टहरू प्राइभेट मोडमा राखेमा उनीहरूको भिसा अस्वीकृत हुन सक्नेछ।
अमेरिकाले गत महिना विदेशी विद्यार्थीहरूको नयाँ भिसा अपोइन्टमेन्ट स्थगित गरेको थियो। यो कदम ट्रम्प प्रशासनले विश्वविद्यालयहरूमा यहुदी विरोधी भावना र अन्य राष्ट्रिय सुरक्षा चिन्ताहरूलाई प्रोत्साहन गरेको आरोप लगाएपछि चालिएको थियो। ट्रम्प प्रशासनले गत महिना हार्वर्ड विश्वविद्यालयलाई भिसाका लागि थप जाँचका लागि छनोट गरेको थियो।
विद्यार्थी भिसाका नयाँ जाँच प्रक्रियाहरू अध्ययनको संस्था जुनसुकै भए पनि सबै विदेशी नागरिकहरूलाई लागू हुनेछन्। सरोकारवालाहरूले यी नयाँ जाँच प्रक्रियाहरूले अमेरिकामा आउन चाहने सम्भावित अन्तर्राष्ट्रिय विद्यार्थीहरूका लागि स्वागत नभएको सन्देश दिने चिन्ता व्यक्त गरेका छन्। यी उपायहरू सामाजिक सञ्जालको आधारमा मात्र नभई आवेदकहरूको राजनीतिक विचारधारा जाँच्ने माध्यम बन्न सक्ने चिन्ता पनि व्यक्त गरिएको छ।
विदेशमन्त्री मार्को रुबियोद्वारा हस्ताक्षरित आन्तरिक निर्देशनमा आवेदकहरूको अनलाइन उपस्थितिको समीक्षा गर्नुपर्ने र नयाँ प्रक्रियाहरू पाँच दिनपछि लागू हुने उल्लेख गरिएको थियो । यसको अर्थ यो नियम यसै सातादेखि पूर्ण रूपमा लागु भएको छ ।
विद्यार्थीहरूको प्रोफाइल जाँच्दा दूतावासका कर्मचारीहरूलाई अमेरिकी नागरिक, संस्कृति, सरकार, संस्था वा स्थापनाका सिद्धान्तहरूप्रति शत्रुतापूर्ण मनोवृत्ति राख्ने आवेदकहरू, विदेशी आतंकवादी र अन्य राष्ट्रिय सुरक्षा खतराहरूलाई समर्थन गर्ने वा गैरकानुनी यहुदी- विरोधी उत्पीडन वा हिंसा गर्ने व्यक्तिहरूलाई पहिचान गर्न निर्देशन दिइएको छ।
नयाँ दिशानिर्देशको व्यापक व्याख्याले योग्य विद्यार्थीहरूलाई पनि भिसा अस्वीकार गर्न सक्ने चिन्ता समेत व्यक्त गरिएको छ। विगतमा अमेरिकाले अमेरिका आउनुअगाडि मानिसहरूको विचारधाराको आलोचना गर्दैनथ्यो। अब यो दृष्टिकोणमा परिवर्तन आएको छ। अमेरिकी विदेश मन्त्रालयले एक लिखित वक्तव्यमा अमेरिकी नागरिकहरूले आफ्नो सरकारले देशलाई सुरक्षित बनाउन, विशेष गरी भिसा प्रणालीसँग सम्बन्धित कुरामा काम गरेको चाहने बताएको थियो।