इजरायलद्वारा इरानका आणविक र सैन्य केन्द्रमाथि हमला, अमेरिकाले भन्यो : सम्लग्नता छैन
प्रकाशित मिति : जेष्ठ २९, २०८२ बिहीबार
Photo by Manuel Silva
इजरायलले इरानविरुद्ध सैन्य आक्रमण सुरु गरेको छ । इरानका आणविक तथा मिसाइल स्थलहरू, सैन्य नेताहरू र वैज्ञानिकहरू लक्षित गरी हवाई बमबारी गरिएको हो । केही गोप्य विध्वंसक गतिविधिहरू पनि गरिएको बताइएको छ।
इजरायलले अमेरिका बिना नै आफ्ना प्रमुख प्रतिद्वन्द्वी इरानमाथि प्रत्यक्ष हमला गरेको हो । हमलामा इरानको इस्लामिक रिभोल्युशनरी गार्ड्स कोर्प्स का कमान्डर जनरल होसैन सलामी मारिएका छन् ।
दुई शीर्ष आणविक वैज्ञानिक र अर्का एक वरिष्ठ जनरलको मृत्यु पनि इरानी सरकारी सञ्चार माध्यमहरूले पुष्टि गरेका छन्। अमेरिकाले यस आक्रमणमा कुनै संलग्नता नभएको स्पष्ट पारेको छ।
राष्ट्रपति डोनाल्ड ट्रम्पले सार्वजनिक रूपमा इजरायली आक्रमणको विरोध गर्दै आणविक सम्झौताको सम्भावना अझै बाँकी रहेको बताएका थिए । तर केही घण्टापछि इजरायली आक्रमण सुरु भयो ।
राति इजरायलले एकपक्षीय कदम चालेको हो । अमेरिकाको प्राथमिकता क्षेत्रीय सुरक्षामा केन्द्रित छ । इरानले अमेरिकाको फौज र स्वार्थलाई लक्षित नगर्ने स्पष्ट सन्देश दिन चाहन्छौं।
बिहीबार राति इजरायलभरि साइरन बजाइएका थिए । इजरायली रक्षा मन्त्री इजरायल काट्जले सम्पूर्ण देशमा आपतकाल घोषणा गर्दै इजरायलको सुरक्षाका लागि गरिएको पूर्व प्रत्याक्रमणपछि मिसाइल र ड्रोन आक्रमणको सम्भावना अत्यन्त उच्च छ भनेका थिए ।
इजरायलले आफ्नो हवाई क्षेत्र बन्द गरेको छ । इरानले पनि तेहरान अन्तर्राष्ट्रिय विमानस्थलबाट उडानहरू स्थगित गरेको छ । इजरायली प्रधानमन्त्री बेन्जामिन नेतन्याहूले यो कारबाही आवश्यक रहदासम्म जारी राखिने बताएका छन ।
इरानले आणविक हतियार निर्माण गरिरहेको भन्ने इजरायली दाबीलाई अस्वीकार गरेको छ । तर इजरायली सैन्य अधिकारीका अनुसार इरान आफ्नो आणविक कार्यक्रममा तीव्र गतिमा अघि बढिरहेको छ ।
बम बनाउन नजिक रहेको थाहा पाएपछि आक्रमण गर्ने निर्णय गरिएको इजरायलले बताएको छ । इरानले भने, यदि आणविक साइटमाथि हमला भयो भने अमेरिका विरुद्ध हमला गर्ने चेतावनी दिएको छ ।
अमेरिकाले इराक, बहराइन, कुवेतबाट कूटनीतिज्ञ र सैन्य परिवारहरूलाई सुरक्षित स्थानमा सार्न सुरु गरिसकेको छ । खाडी क्षेत्रमा अमेरिकी सैन्य अड्डाहरूमा सुरक्षा मजबुत पारिएको छ।
यो आक्रमणले इजरायल र इरानबीचको द्वन्द्वलाई पूर्ण सैन्य संघर्षमा रूपान्तरण गर्न सक्छ । जसको प्रभाव केवल पश्चिम एसिया सीमित नभई विश्व स्तरमा नै पर्ने देखिन्छ।