अमेरिका आएको एकबर्ष नहुँदै टीपीएस लिएकाहरुले अहिले पनि एसाइलम आवेदन दिनसक्ने
प्रकाशित मिति : जेष्ठ २२, २०८२ बिहीबार
ट्रम्प प्रशासनले नेपालको टीपीएस आगामी अगस्त ५ देखि समाप्त गर्ने निर्णय गरेको छ । यो अवस्थामा टीपीएसवाहकले अबका आफ्ना विकल्पहरुबारे विचार गरिरहेका छन् । त्यसमध्ये स्वदेश फर्कन ज्यानको जोखिम भएकाहरुका लागि एसाइलम एउटा विकल्प हुनसक्ने कानुनविदहरुको सुझाव छ ।
युएससीआईएसका अनुशार अमेरिका आएको एकबर्ष नहुँदै टीपीएस लिएकाहरुलाई एसाइलमको एकबर्षे नियम हुँदैन । अध्यागमन नियमहरूको व्याख्या अनुसार टीपीएस प्रदान गरिएका व्यक्तिहरूले अमेरिकामा एसाइलम फाइल गर्नको लागि विस्तारित समयसिमा पाउन सक्नेछन् । अर्थात् अमेरिका आएको एकबर्ष नहुँदै टीपीएस लिएकाहरुले अगस्त ५ भन्दा अगाडि एसाइलम आवेदन दिन चाहेको खण्डमा एकबर्षको समयसिमाको परवाह नगरी दिनसक्नेछन् ।
हालको नियमहरूले शरणार्थीहरूलाई आवेदन फाइल गर्नको लागि उनीहरूको आगमन मितिबाट सामान्यतया एक वर्षको समय दिइएको छ। यद्यपि असाधारण परिस्थितिहरू सामना गर्ने व्यक्तिहरूको लागि अपवादहरू रहेका छन् । टीपीएसलाई पनि असाधारण अवस्थाका रुपमा स्वीकार गरिने संघीय नियमहरूको कोडमा उल्लेख छ ।
संघीय नियमहरूको कोडमा टीपीएसलाई असाधारण अवस्थाका रुपमा स्वीकार गरिनेमात्र उल्लेख भएपनि थप व्याख्या भने थिएन । तर युएससीआईएसले यसबारे थप व्याख्या गर्दै टीपीएस लिंदा एकबर्षको घडी समाप्त भइसकेको छैन भने अमेरिकामा आइपुगेको एक वर्ष भित्र एसाइलमका लागि फाइल गर्नुपर्ने आवश्यकतामा उक्त घडी रोकिने जनाएको थियो ।
उदाहरणका लागि कोही व्यक्तिले अमेरिका आएको ६ महिनामा नै टीपीएस लिएको थियो भने एसाइलम आवेदन दिने प्रयोजनका लागि अहिलेपनि उसको अवधि ६ महिना नै गणना हुन्छ । उसको टीपीएस समाप्त भएको अर्को ६ महिनाभित्र एसाइलम आवेदन दिनसक्छ । जसको अर्थ अमेरिकाको आएको एकबर्ष नपुग्दै टीपीएस लिएकाहरुले अहिले पनि अमेरिकामा एसाइलम फाइल गर्न पाउँछन् । तर एसाइलमका लागि योग्य व्यक्तिलाई टीपीएस समाप्त भएपछिको अवधि नकुर्न कानुनविदहरुको सुझाव छ । किनभने टीपीएस समाप्त भइसकेपछि उनीहरु तत्काल देशनिकालाको जोखिममा पर्नसक्ने भएकाले टीपीएस समाप्त हुनु अगाडि नै कदम चाल्न सुझाव दिइएको छ ।
यो स्पष्टीकरणले एकबर्षको अवधिभित्र एसाइलम फाइल गर्न चुनौतीको सामना गरेका टीपीएस भएका व्यक्तिहरूका लागि सम्भावित रूपमा महत्त्वपूर्ण फाइदाहरू प्रदान गर्दछ । एसाइलम योग्यताबारे अनभिज्ञता भएका, कानूनी प्रतिनिधित्व पहुँच गर्न कठिनाई भएका, उत्पीडनको आवश्यक प्रमाण जुटाउन सयम लागेकाहरुलाई यो व्याख्याले राहत प्रदान गर्छ ।
टीपीएसले घडी रोकेका कारण आवेदकहरुले अब यी अवरोधहरू छिचोल्न र अझै पनि एसाइलम आवेदन दिन सक्छन् । एसाइलम आवेदनहरूको जटिलताहरू पत्ता लगाउनका लागि कानुनी सल्लाह खोज्नु उचित हुन्छ । अध्यागमन वकिलले व्यक्तिगत परिस्थितिहरूको मूल्याङ्कन गरेर उचित सल्लाह दिनसक्छन् भने उचित आवेदन प्रक्रियाहरू अपनाइएको सुनिश्चित गर्न सक्छन्।