ट्रम्पको निरन्तर दबाबपछि युक्रेनसामु रुसको प्रस्ताव – ‘आगामी जुन २ मा वार्ता गरौं’
प्रकाशित मिति : १४ जेष्ठ २०८२, बुधबार
Russia State Awards
रुसले युक्रेनसँग अर्को चरणको प्रत्यक्ष वार्ता जुन २ मा टर्कीको इस्तानबुलमा आयोजना गर्ने प्रस्ताव गरेको छ। रुसी विदेश मन्त्री सर्गेई लभरोभले बुधबार यो जानकारी दिँदै दिगो शान्ति सम्झौता हासिल गर्ने लक्ष्य रहेको बताए।
कीभबाट हालसम्म कुनै औपचारिक प्रतिक्रिया आएको छैन। अमेरिकी राष्ट्रपति डोनाल्ड ट्रम्पको दबाबमा, दोस्रो विश्वयुद्धपछिको युरोपको सबैभन्दा रक्तपातपूर्ण द्वन्द्व अन्त्य गर्न प्रयास भइरहेको छ। यसै महिनाको सुरुमा, रुस र युक्रेनका प्रतिनिधिहरू मार्च २०२२ पछि पहिलो पटक इस्तानबुलमा भेटेका थिए। रुसले आफ्नो छिमेकीमा सैनिक पठाएको एक महिनापछि यो पहिलो भेट थियो।
मे १६ मा भएको वार्तामा कीभ र पश्चिमी सहयोगीहरूले चाहेको युद्धविराममा सहमति हुन सकेन। मस्कोले युद्धविरामका लागि केही शर्तहरू पूरा हुनुपर्ने अडान राखेको छ। ‘शान्ति प्रक्रियाको सफलतामा इमानदारीपूर्वक चासो राख्ने सबैले इस्तानबुलमा नयाँ वार्तालाई समर्थन गर्छन् भन्ने हाम्रो आशा छ’, लभरोभले एक विज्ञप्तिमा भने।
रुसी राष्ट्रपति भ्लादिमिर पुटिनले मे १९ मा ट्रम्पसँगको फोन वार्तापछि मस्को युक्रेनसँग शान्ति सम्झौताको मेमोरेन्डममा काम गर्न तयार रहेको बताए। युक्रेन शान्ति वार्ताका लागि रुसका प्रतिनिधि प्रमुख भ्लादिमिर मेदिन्स्कीले टेलिग्राममा भने, ‘हामीले युक्रेनका रक्षा मन्त्री रुस्तेम उमेरोभलाई अर्को बैठकको मिति र स्थान प्रस्ताव गरेका छौं। हामी त्यहीँ सम्भावित युद्धविरामको प्याकेज सम्झौताका बुँदाहरूमा गम्भीर छलफल सुरु गर्न तयार छौं।’ उनले युक्रेनबाट जवाफको अपेक्षा गरेको बताए।
रुसी विदेश मन्त्रालयकी प्रवक्ता मारिया जाखारोभाका अनुसार, रुस र युक्रेनले आ-आफ्नो शान्ति र युद्धविरामको दृष्टिकोण तयार गरी अर्को वार्तामा छलफल र कागजात आदानप्रदान गर्ने सहमति भएको छ।