नेपाली चलचित्र ‘ऊनको स्वीटर’ अमेरिकामा रिलिज, झण्डै ३ दर्जन थिएटरमा प्रदर्शन जारी
प्रकाशित मिति : जेष्ठ ५, २०८२ सोमबार
नेपाली चलचित्र ‘ऊनको स्वीटर’ अमेरिकाका प्रमुख शहरहरूमा रिलिज भएको छ। यो चलचित्रले नेपालमा रिलिजको पहिलो हप्तामै ५ करोड ७५ लाखको आकर्षक व्यापार गर्न सफल भएको छ। विपिन कार्की, मिरुना मगर, एलिसा पराजुली, र परिशी थापा लगायतका चर्चित कलाकारहरूको अभिनय रहेको यो चलचित्र अमेरिकाका ३० भन्दा बढी शहरहरूमा एकसाथ प्रदर्शनमा आएको हो। अमेरिकाका नेपाली दर्शकहरूले उत्साहका साथ यो चलचित्र हेरिरहेका छन्।
‘ऊनको स्वीटर’ ले न्यूयोर्कदेखि क्यालिफोर्नियासम्म, टेक्सासदेखि वासिङ्टनसम्म र ओहायोदेखि फ्लोरिडासम्मका नेपाली दर्शकहरूलाई आफ्नो नजिकको सिनेमा हलमा मनोरञ्जन प्रदान गरेको छ। विशेषगरी, यो चलचित्रको कथावस्तु, अभिनय र प्रस्तुतिले दर्शकहरूको मन जितेको छ, जसले गर्दा सिनेमा हलहरूमा दर्शकहरूको भीड लागेको छ।
यो चलचित्र अमेरिकाका विभिन्न क्षेत्रहरूमा प्रदर्शनमा छ। पूर्वोत्तर क्षेत्रमा म्यासाचुसेट्स, न्यू ह्याम्शायर, कनेक्टिकट र न्यूयोर्कका सिनेमा हलहरूमा यो चलचित्र हेर्न सकिन्छ। त्यस्तै, मिड-एट्लान्टिक क्षेत्रमा पेन्सिलभेनिया, मेरील्याण्ड, भर्जिनिया र वासिङ्टन डीसीमा प्रदर्शन भइरहेको छ।
मिडवेस्ट क्षेत्रमा ओहायो, इलिनोइस, आयोवा, विस्कन्सिन, मिसौरी, नर्थ डकोटा र केन्टकीका सिनेमा हलहरूमा यो चलचित्र उपलब्ध छ। दक्षिणी क्षेत्रमा जर्जिया, फ्लोरिडा र टेनेसीमा यो चलचित्र प्रदर्शन भइरहेको छ।
दक्षिण मध्य क्षेत्रमा टेक्सासमा यो चलचित्र हेर्न सकिन्छ। माउन्टेन वेस्ट क्षेत्रमा कोलोराडोमा र पश्चिमी तटमा वासिङ्टन र क्यालिफोर्नियामा यो चलचित्र प्रदर्शनमा छ।
चलचित्रका टिकटहरू अनलाइनमार्फत सहजै उपलब्ध छन्। दर्शकहरूलाई सिट सुनिश्चित गर्न समयमै टिकट बुक गर्न अनुरोध गरिएको छ। टिकट बुक गर्नका लागि यो लिङ्क प्रयोग गर्न सकिन्छ। सिमित सिटहरू उपलब्ध भएकाले दर्शकहरूलाई चाँडो बुकिङ गर्न सल्लाह दिइएको छ।