पहलगाम आक्रमण : भारतले लगायो पाकिस्तानी विमानहरूलाई आफ्नो हवाई क्षेत्रमा प्रतिबन्ध
प्रकाशित मिति : बैशाख १७, २०८२ बुधबार
भारतले पाकिस्तानी विमानहरूका लागि आफ्नो हवाई क्षेत्र पूर्ण रूपमा बन्द गरेको छ। बुधबार जारी गरिएको नोटिस टु एयरमेन (एनओटीएमएम)का अनुसार पाकिस्तानमा दर्ता भएका विमानहरू, पाकिस्तानी एयरलाइन्स वा अपरेटरहरूले सञ्चालन, स्वामित्व वा लीजमा लिएका विमानहरू, साथै सैन्य विमानहरूले भारतीय हवाई क्षेत्र प्रयोग गर्न पाउने छैनन्।
भारत सरकारले वायुसेनालाई जारी गरेको सूचना अनुसार पाकिस्तानी विमानहरूमा प्रतिबन्ध अप्रिल ३० देखि मे २३ सम्म लागू हुनेछ।
यो निर्णय गत मंगलबार जम्मू र कश्मीरको पहलगाममा भएको आतंककारी आक्रमणको परिणामस्वरूप आएको हो। उक्त आक्रमणमा २६ जनाको मृत्यु भएको थियो, जसमा एक जना नेपाली नागरिक पनि थिए । आक्रमणमा अन्य धेरै पर्यटकहरू घाइते भएका थिए। भारतले यो आक्रमणको लागि पाकिस्तानले सीमापार आतंकवादलाई समर्थन गरेको आरोप लगाएको छ।
आक्रमणपछि भारत सरकारले पाकिस्तानमाथि दबाब सिर्जना गर्न विभिन्न कदमहरू चालेको छ। यी कदमहरूमा सिन्धु जल सन्धिको निलम्बन, पाकिस्तान उच्चायोगको कर्मचारी संख्या घटाउने र अटारी सीमा चेकपोस्ट बन्द गर्ने समावेश छन्। जवाफमा, पाकिस्तानले पनि भारतीय उडानहरूका लागि आफ्नो हवाई क्षेत्र बन्द गरेको छ र शिमला सम्झौता सहित भारतसँगका अन्य सम्झौताहरूबाट बाहिरिने धम्की दिएको छ।
दुई देशहरूबीच तनाव चुलिएको छ। पाकिस्तानले नियन्त्रण रेखा र जम्मू र कश्मीरको अन्तर्राष्ट्रिय सीमामा बारम्बार युद्धविराम सम्झौता उल्लंघन गरिरहेको छ। भारतीय सेनाले यी उल्लंघनहरूको कडा जवाफ दिइरहेको छ।