यूएससीआईएसद्वारा ३,५६८ आप्रवासीहरूको सामाजिक सञ्जाल गतिविधिको जाँच
यूएससीआईएसले ३,५६८ आप्रवासीहरूको सामाजिक सञ्जाल गतिविधिको जाँच गरेको जनाएको छ। ट्रम्प प्रशासनको पहिलो १०० दिनको प्रतिवेदनअनुसार यूएससीआईएसले ३ हजार ५ सय भन्दा धेरै आप्रवासन लाभका लागि आवेदन दिने विदेशी नागरिकहरूको सामाजिक सञ्जाल गतिविधिलाई मूल्याङ्कन गरेको हो।
अप्रिल ९, २०२५ मा घोषणा गरिएको यो नयाँ नीतिअनुसार यूएससीआईएसले सामाजिक सञ्जाल चेकजाँच सुरु गरेको हो, जसमा यहूदीविरोधी सामग्री वा व्यवहार र अमेरिकाविरोधी भावनाहरूलाई विशेष ध्यान दिइएको छ। राष्ट्रिय सुरक्षालाई सुदृढ गर्ने नीति अनुरूप ग्रिनकार्ड आवेदक, विदेशी विद्यार्थीहरू र यहूदीविरोधी गतिविधिहरूसँग सम्बन्धित शैक्षिक संस्थाहरूसँग आबद्ध व्यक्तिहरूलाई लक्षित गरिएको छ।
साथै, यहूदी व्यक्तिहरूविरुद्ध शारीरिक उत्पीडनका कार्यहरूलाई पनि आप्रवासन अनुरोध अस्वीकार गर्ने आधार मानिनेछ। सामाजिक सञ्जालमा यहूदीविरोधी आतङ्कवाद, यहूदीविरोधी आतङ्कवादी सङ्गठनहरू—जस्तै हमास, प्यालेस्टिनी इस्लामिक जिहाद, हिजबुल्लाह र अन्सार अल्लाह हुथीहरू—वा अन्य यहूदीविरोधी वा अमेरिकाविरोधी गतिविधिहरूलाई समर्थन, प्रचार वा बढावा दिने सामग्रीलाई आप्रवासन लाभका लागि गरिने विवेकपूर्ण निर्णयमा नकारात्मक कारकको रूपमा लिइने यूएससीआईएसले जनाएको छ। यसमा भिसा, ग्रीन कार्ड र नागरिकताका आवेदनहरू समावेश छन्।
यो पहल राष्ट्रपति ट्रम्पका कार्यकारी आदेशहरूबाट उत्पन्न भएको हो। नयाँ मार्गदर्शनअन्तर्गत यूएससीआईएसले विशेष रूपमा सामाजिक सञ्जाल पोस्टहरू र अन्य गतिविधिहरूको जाँच गर्नेछ। खासगरी यहूदी विरोधी आतङ्कवाद, हिंसात्मक विचारधारा वा हमास, प्यालेस्टिनी इस्लामिक जिहाद, हिजबुल्लाह र अन्सार अल्लाह जस्ता आतङ्कवादी संगठनहरूलाई समर्थन गरेको पाइएमा त्यसको चेकजाँच हुनेछ।
अमेरिकामा विश्वका बाँकी आतङ्कवादी समर्थकहरूका लागि कुनै ठाउँ नभएको र तिनीहरूलाई भर्ना गर्न वा यहाँ रहन दिन बाध्य नहुने डिपार्टमेन्ट अफ होमल्याण्ड सेक्युरिटीकी उच्च अधिकारी ट्रिसिया म्याकलफलिनले बताएकी छिन्। अमेरिकामा आएर पहिलो संशोधनको आडमा यहूदी विरोधी हिंसा र आतङ्कवादको वकालत गर्न खोज्नेलाई अमेरिकामा स्वागत नगरिने उनको भनाइ छ।
यो नीति अनुसार यूएससीआईएस अधिकारीहरूले अब यहूदी विरोधी आतङ्कवाद वा सम्बन्धित संगठनहरूलाई समर्थन, प्रचार वा सहयोग गरेको प्रमाणलाई आप्रवासन लाभसम्बन्धी निर्णयहरूमा नकारात्मक कारकको रूपमा लिनेछन्। यसमा भिसा आवेदन, ग्रीन कार्ड आवेदन वा एजेन्सीद्वारा प्रशोधन गरिएका अन्य अनुरोधहरू समावेश हुनेछन्। अनलाइन गतिविधिहरूभन्दा बाहिर यहूदी विरोधी उत्पीडनका शारीरिक कार्यहरूले पनि आवेदकहरूविरुद्ध भारी प्रभाव पार्नेछ।
