ट्रम्प प्रशासनद्वारा कर डेटाबाट ७० लाख कागजातविहीन आप्रवासी खोज्न आईआरएसलाई आग्रह
अमेरिकामा गैरकानुनी रूपमा बसिरहेका करिब ७० लाख मानिसलाई पत्ता लगाउन संघीय आप्रवासन अधिकारीहरूले आन्तरिक राजस्व सेवा आईआरएसमा गोप्य कर डेटा प्रयोग गर्ने योजना बनाएका छन्। ट्रम्प प्रशासनले कर प्रणालीलाई आप्रवासीहरूलाई पक्राउ र निर्वासन गर्न प्रयोग गर्न खोजिरहेको सन्दर्भले नयाँ र चिन्ताजनक कदमको संकेत गरेको छ ।
यसअघि होमल्यान्ड सेक्युरिटी विभागका अधिकारीहरूले ७ लाख व्यक्तिहरूको खोजीमा आईआरएसको सहयोग मागेका थिए, जसलाई अन्तिम देशनिकाला आदेश जारी गरिएको थियो । उनीहरूले करदाताको नाम र ठेगाना उपलब्ध गराउन गोप्य रूपमा संरक्षित कर डेटा प्रणाली प्रयोग गर्न आग्रह गरेका थिए। तर, यी दुई निकायबीच अझै कति डेटा र कसरी साझेदारी गर्ने भन्नेमा सहमति भएको छैन।
बिहीबार आप्रवासन कार्यान्वयन अधिकारीहरूले आफ्नो मागको संख्या बढाएका छन् । डिपार्टमेन्ट अफ होमल्याण्ड सेक्युरिटीका अधिकारीहरूले सुरुमा २० लाख करदाताबारे प्रारम्भिक जानकारी पठाउने र अन्ततः ७० लाख व्यक्तिको खोजीमा सहयोग माग्ने बताएका थिए। संघीय अधिकारीहरूको अनुमान अनुशार अमेरिकामा करिब १ करोड १० लाख कागजातविहीन आप्रवासी छन्।
आईआरएसका अधिकारीहरू यो प्रस्तावबाट स्तब्ध भएका छन् । दुवै निकायका वकिलहरूले पछिल्ला दिनहरूमा यो विषयको विवरणमा छलफल गरिरहेका छन्। कार्यवाहक आईआरएस आयुक्त मेलानी क्राउजले आफ्ना सहकर्मीहरूलाई ट्रम्प प्रशासनको आप्रवासन कार्यान्वयनमा आईआरएस प्रणाली प्रयोग गर्ने लक्ष्यमा अन्ततः सहमत हुने अपेक्षा राखेको बताएकी छन् ।
सामान्यतया, व्यक्तिगत कर जानकारी—जस्तै नाम र ठेगाना—लाई गोप्य मानिन्छ । र आईआरएसभित्र कडाइका साथ संरक्षित गरिन्छ। कर डेटा गैरकानुनी रूपमा खुलासा गर्नाले नागरिक र फौजदारी सजाय निम्त्याउन सक्छ।
तर, सीमित परिस्थितिमा, विशेष गरी अदालतको अनुमतिमा फौजदारी अनुसन्धानका लागि कानुन कार्यान्वयनसँग यो जानकारी साझेदारी गर्न सकिन्छ। कर डेटालाई फौजदारी सजाय लागू गर्न प्रयोग गर्नु असामान्य र सम्भवतः गैरकानुनी हुने जानकारहरूले बताएका छन् । आईआरएसका कार्यकारीहरूले होमल्यान्ड सेक्युरिटी अधिकारीहरूलाई यो अनुरोधले फौजदारी अनुसन्धानको साँघुरो छुटलाई उल्लंघन गर्ने सम्भावना रहेको बताएका छन्। देशमा गैरकानुनी रूपमा बस्नु फौजदारी नभई सिभिल अपराध हो।
यदि यो सम्झौता स्वीकृत भएमा यो करदाताको जानकारी र आप्रवासन कार्यान्वयन कसरी व्यवस्थापन गरिन्छ भन्नेमा ठूलो परिवर्तन हुनेछ। आईआरएसले वर्षौंदेखि कागजातविहीन कामदारहरूलाई उनीहरूको कर जानकारी गोप्य रहने र निर्वासनको डर बिना आयकर रिटर्न दाखिल गर्न सुरक्षित छ भनी आश्वासन दिँदै आएको छ।
कागजातविहीन आप्रवासीहरूले हरेक वर्ष संघीय करमा कैयन बिलियन डलर तिर्छन्। उनीहरूको ज्यालामा पनि अन्य अमेरिकी बासिन्दाहरूमा लाग्ने कर कटौती र रिपोर्टिङ आवश्यकताहरू लागू हुन्छन्। धेरै आप्रवासीहरूले कर रिटर्न दाखिल गर्छन् र कर तिरेको रेकर्डले भविष्यमा कानुनी बसोबासको लागि आधार बनाउन सक्छ भन्ने आशामा बचत गर्छन्।
उदाहरणका लागि १९८६ को आप्रवासन सुधार र नियन्त्रण ऐनले कर तिरेका कागजातविहीन आप्रवासीहरूलाई स्थायी कानुनी हैसियत प्रदान गरेको थियो। आईआरएसले सोसल सेक्युरिटी नम्बरका लागि योग्य नहुनेलाई व्यक्तिगत करदाता नम्बर मार्फत दाखिल गर्न अनुमति दिन्छ।
फेब्रुअरीमा होमल्याण्ड सेक्युरिटीले कर निकायसँग ७ लाख व्यक्तिहरूको नाम, ठेगाना, फोन नम्बर र इमेल ठेगाना मागेको थियो, जसलाई देशमा गैरकानुनी रूपमा रहेको शंका गरिएको थियो। साथै, कागजातविहीन कामदार भाडामा लिएको शंकास्पद व्यवसायहरूमा अनुसन्धान खोल्न पनि आग्रह गरेको थियो। त्यतिबेलाका कार्यवाहक आयुक्तले यो अनुरोध स्पष्ट रूपमा गैरकानुनी भएको भन्दै तुरुन्तै अस्वीकार गरेका थिए। तर ती कार्यवाहक आयुक्तले दशकौं लामो आईआरएस करियरपछि अवकाश लिइसकेका छन् ।
