ट्रम्पले पुटिनसँग रिसाएको बताएपछि क्रेमलिनले भन्यो – ‘शान्तिका लागि काम गरिरहेको छौं’
प्रकाशित मिति : चैत्र १८, २०८१ सोमबार
रुस र अमेरिकाबीच युक्रेन सङ्कट समाधानका लागि निरन्तर संवाद भइरहेको क्रेमलिनले जनाएको छ।
अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनप्रति असन्तुष्टि जनाए पनि दुवै देशबीच शान्ति सम्झौता र द्विपक्षीय सम्बन्ध सुधारका लागि प्रयास जारी रहेको क्रेमलिनका प्रवक्ता दिमित्री पेस्कोभले सोमबार बताएका हुन्।
पछिल्लो समय राष्ट्रपति ट्रम्पले एबीसी न्युजलाई दिएको अन्तर्वार्तामा युक्रेनी राष्ट्रपति भोलोडिमिर जेलेन्स्कीको विश्वसनीयतामाथि पुटिनले प्रश्न उठाएको भन्दै आफू निकै ‘रिसाएको’ बताएका थिए।
ट्रम्पले पुटिनको अभिव्यक्तिप्रति आक्रोश व्यक्त गर्दै रुसी तेल किन्ने मुलुकहरूमाथि २५ देखि ५० प्रतिशतसम्मको अतिरिक्त शुल्क लगाउने चेतावनीसमेत दिएका थिए ।
यद्यपि, ट्रम्पले पत्रकारहरूसँग कुराकानी गर्दै भनेका थिए, ‘म पुटिनप्रति निराश छु तर हामी बिस्तारै प्रगति गर्दैछौं ।’
क्रेमलिन प्रवक्ता पेस्कोभले सोमबार भने, ‘अहिले पनि हामी अमेरिकी पक्षसँग काम गरिरहेका छौँ, मुख्यतः विगतको अमेरिकी प्रशासनका कारण बिग्रिएको द्विपक्षीय सम्बन्ध सुधार गर्न लागिरहेका छौँ ।’
उनले युक्रेन सङ्कट समाधानका लागि केही नयाँ प्रस्तावहरूमा समेत छलफल भइरहेको खुलासा गरेका छन्।
‘यो प्रक्रिया जटिल भएकाले समय लाग्ने छ। तर, आवश्यक परे ट्रम्प र पुटिनबीच छोटो समयमै टेलिफोन वार्ता हुन सक्छ’, पेस्कोभले बताए।
ट्रम्पले आफूलाई ‘शान्ति स्थापनाकर्मी’को रूपमा चिनाउन चाहेको र युक्रेनमा तीन वर्षदेखि जारी युद्ध अन्त्य गर्न चाहेको बताएका छन्। उनले बारम्बार युद्धले अमेरिका र रुसबिच विश्वयुद्धको रूप लिन सक्ने चेतावनी पनि दिएका छन्।
यसैबिच, फिनल्यान्डका राष्ट्रपति अलेक्ज्याण्डर स्टबले आइतबार अमेरिकी राष्ट्रपति डोनाल्ड ट्रम्पलाई शनिबार फ्लोरिडा बैठकमा युक्रेन युद्ध विराम स्थापना गर्न समय सीमा तोक्न आवश्यक रहेको बताएका थिए।