रोजगारमा आधारित ग्रिनकार्डका लागि लेबर सर्टिफिकेशन आउन कम्तीमा १५ महिना
अमेरिकाको लेबर डिपार्टमेन्टले सेप्टेम्बर २०२३ अगाडि फाइल गरिएका रोजगारमा आधारित ग्रिनकार्डका लागि लेबर सर्टिफिकेशनको समीक्षा गरिरहेको जनाएको छ । लेबर डिपार्टमेन्टको विदेशी श्रम प्रमाणिकरण कार्यालयले स्थायी लेबर सर्टिफिकेशन र प्रचलित तलब निर्धारण आवेदनको प्रशोधन समयबारे आफ्नो पछिल्लो रिपोर्ट जारी गरेको हो ।
जस अनुशार फेब्रुअरी १, २०२५ सम्म लेबर डिपार्टमेन्टले सेप्टेम्बर २०२३ वा सोभन्दा अघि दर्ता गरिएका लेबर सर्टिफिकेशन आवेदनहरूको विश्लेषक समीक्षा गरिरहेको जनाएको छ । अर्थात् लेबर सर्टिफिकेशनका लागि अहिले झण्डै डेढ बर्ष लाग्ने गरेको छ ।
फेब्रुअरी १, २०२५ सम्म डिपार्टमेन्टले जुलाई २०२४ मा दर्ता गरिएका रोजगारमा आधारित ग्रिनकार्डका प्रचलित तलब निर्धारण अनुरोधहरू जारी गरिरहेको छ। जुलाईमा २०२४ मा दर्ता गरिएका झण्डै ६ हजार ७ सय प्रचलित तलब निर्धारणका आवेदनहरु अझै बाँकी रहेका छन् । अगस्त २०२४ देखि डिसेम्बर २०२४ सम्म पेश गरिएका प्रचलित तलब निर्धारण अनुरोधहरुको संख्या हरेक महिना १२ देखि १३ हजारको हाराहारीमा छ भने जनवरी २०२५ मा १५५९० आवेदन पेश गरिएका छन् ।
अमेरिकामा रोजगारमा आधारित ग्रिनकार्ड आवेदन दिने नेपालीहरुको संख्या उल्लेख्य रहेको छ । तर तेश्रो श्रेणीको रोजगारमा आधारित ग्रिनकार्डका लागि निकै लामो समय लाग्दै आएको छ । अझ यो महिनाका लागि युएससीआईएसले रोजगारमा आधारित ग्रिनकार्डका लागि भिसा बुलेटिनको फाइलिङ मिति प्रयोग नगर्ने भएपछि अमेरिकाभित्रै हुनेहरुका सन्दर्भमा रोजगारमा आधारित ग्रिनकार्ड फाइल गर्नका लागि प्रतिक्षा अवधिमा बृद्धि भएको छ ।
युएसससीआईएसले फेब्रुअरीमा अमेरिकाभित्र हुनेहरुले रोजगारमा आधारित ग्रिनकार्ड आवेदन फाइन गर्नका लागि भिसा बुलेटिनको फाइनल एक्सन मितिलाई प्रयोग गरिरहेको छ । जबकी जनवरीमा भिसा बुलेटिनको फाइलिङ मितिलाई नै युएससीआईएसले ग्रिनकार्ड आवेदन आई ४८५ फाइल गर्ने मितिका रुपमा स्वीकार गरेको थियो ।
अमेरिकी विदेश मन्त्रालयको कन्सुलर अफेयर्सले फेब्रुअरीको भिसा बुलेटिनमा रोजगारमा आधारित ग्रीन कार्डका लागि फाइलिङ र फाइनल एक्सन मितिहरूमा जनवरीको तुलनामा कुनै परिवर्तन गरेको छैन । फेब्रुअरीमा पनि पहिलो श्रेणीका सन्दर्भमा ग्रिनकार्ड फाइल गर्ने र आप्रवासी भिसा पाउने मिति करेन्ट नै रहेको छ ।
फेब्रुअरी महिनामा पनि अमेरिकाभित्रै हुनेहरुका सन्दर्भमा पहिलो श्रेणीको आवेदन आई १४० का साथमा ग्रिनकार्ड आवेदन आई ४८५ फाइल गर्न पाइने भएको छ भने अमेरिकाबाहिर हुनेले भिसा करेन्ट हुन्जेल कुर्नु नपर्ने भएको छ । यद्यपी दूतावासहरुमा रहेको भिसा ब्याकलगका कारण अमेरिकाबाहिर हुनेलाई आप्रवासी भिसा अन्तरवार्ता पाउन भने लामो समय लाग्दै आएको छ ।
रोजगारमा आधारित दोश्रो श्रेणीको ग्रिनकार्डका लागि जनवरीमा महिनामा पनि आई ४८५ ग्रिनकार्ड आवेदन फाइल गर्न पाइने प्राथमिकता मिति १ अगस्ट २०२३ थियो, तर यो फेब्रुअरीमा १ अप्रिल २०२३ मा सरेको छ। अमेरिकाबाहिर हुनेले पनि १ अप्रिल २०२३ अगाडि प्राथमिकता मिति भएमा फेब्रुअरीमा भिसा अन्तरवार्ता र आप्रवासी भिसा पाउनसक्नेछन् ।
तेश्रो श्रेणीको ग्रिनकार्ड आवेदकका लागि १ मार्च २०२३ भन्दा अगाडि लेबर सर्टिफिकेशन फाइल गरेका आवेदकहरुले जनवरीमा आई १४० आवेदनका साथमा ग्रिनकार्ड आवेदन आई ४८५ समेत फाइल गर्न सक्थे तर फेब्रुअरीमा यो मिति पनि १ डिसेम्बर २०२२ मा सरेको छ। यदि आवेदकले १ डिसेम्बर २०२२ भन्दा पहिले लेबर सर्टिफिकेशन फाइल गरेर स्वीकृत भइसकेको छ भने उनीहरूले फेब्रुअरीमा आफ्नो आई ४८५ ग्रिनकार्ड आवेदन दर्ता गर्न सक्छन्। अमेरिकाबाहिर भिसा कुरिरहेकाहरुका सन्दर्भमा १ डिसेम्बर २०२२ अगाडि लेबर सर्टिफिकेशन फाइल गरेर स्वीकृत भएकाहरुले फेब्रुअरीमामा भिसाका लागि अन्तरवार्ता पाउन सक्नेछन् ।
रोजगारमा आधारित तेश्रो श्रेणीका अनस्कील्ड कामदारका सन्दर्भमा मिति ८ डिसेम्बर २०२० भन्दा अगाडि लेबर सर्टिफिकेशन फाइल गरेकाहरुले फेब्रुअरीमामा अमेरिकामा ग्रिनकार्ड आवेदन आई ४८५ फाइल गर्न वा विदेशमा भिसाका लागि अन्तरवार्ता पाउन सक्नेछन् ।
