युक्रेनलाई हतियारको आपूर्ति तीव्र पार्न रक्षा मन्त्रालयलाई राष्ट्रपति बाइडेनको निर्देशन
प्रकाशित मिति : पुस १०, २०८१ बुधबार
अमेरिका राष्ट्रपति जो बाइडेनले युक्रेनलाई हतियारको आपूर्ति तीव्र पार्न रक्षा मन्त्रालयलाई निर्देशन दिएका छन ।
अमेरिका युक्रेनलाई रूसी सेनाको विरुद्धको रक्षा सुदृढ बनाउन निरन्तर काम गर्दै जानेछ बाइडेनले भनेका छन । उनले युक्रेनलाई अमेरिकी सहयोग जारी रहने प्रतिबद्धता जनाएका छन ।
बुधबार युक्रेनमा क्रिसमसको दिनमा गरिएको रूसको ठूलो आक्रमणको निन्दा गर्दै त्यसले महत्वपूर्ण ऊर्जा पूर्वाधारलाई क्षति पुर्याएको बाइडेनले बताए ।
घृणित आक्रमणको उद्देश्य चिसो हिउँदमा युक्रेनी जनतालाई तापक्रम र बिजुलीबाट वञ्चित गर्नु र ऊर्जा पूर्वाधारलाई जोखिममा पार्नु हो बाइडनले वक्तव्यमा भनेका छन ।
पछिल्ला केही महिनाहरूमा अमेरिकाले युक्रेनलाई सयौं वायु प्रतिरक्षा मिसाइलहरू प्रदान गरेको छ । र थप मिसाइलहरू प्रदान गर्ने तयारी गरेको छ ।
राष्ट्रपति निर्वाचित ट्रम्पका युक्रेन र रूसका लागि विशेष दूतका रूपमा नियुक्त रिटायर्ड लेफ्टिनेन्ट जनरल कीथ केलोगले पनि आक्रमणको आलोचना गरेका छन ।
क्रिसमस शान्तिको समय हुनुपर्छ तर युक्रेनमा क्रिसमसको दिन क्रूर आक्रमण गरियो उनले X मा लेखेका छन ।
प्रभुको जन्मदिनमा ठूलो मात्रामा मिसाइल र ड्रोन आक्रमण सुरु गर्नु गलत हो। विश्वले दुवै पक्षका गतिविधि नजिकबाट हेरिरहेको छ । शान्ति ल्याउन अमेरिकाको संकल्प अझ दृढ छ उनले लेखेका छन ।
बाइडन प्रशासनले सोमबार युक्रेनका लागि ७२५ मिलियन डलरको नयाँ सुरक्षा सहायता प्याकेज घोषणा गरेको थियो । जसमा थप भूमिगत बारुदी सुरुङ र सटीक रकेट प्रक्षेपण प्रणालीको प्रावधान समावेश रहेको छ ।
युक्रेनी राष्ट्रपति भोलोडिमिर जेलेन्स्कीले X मा यो आक्रमणलाई अमानवीय भनेका छन् ।
यसैबीच, रूसको रक्षा मन्त्रालयले लामो दुरीका सटीक हतियार र ड्रोन आक्रमणले युक्रेनका महत्वपूर्ण ऊर्जा पूर्वाधारहरूमा लक्षित प्रहार गर्दै पुटिनको सेनाको लक्ष्य पूरा गरेको दाबी गरेको छ ।