अफ्रिकामा एमपक्सबाट १ हजारबढीको मृत्यु
प्रकाशित मिति : मंसिर २८, २०८१ शुक्रबार
अफ्रिकामा एमपक्सबाट सङ्क्रमितको सङ्ख्या ६५ हजार नाघेको छ । १ हजार २ सय जनाको मृत्यु भएको अफ्रिका सेन्टर फर डिजिज कन्ट्रोल एण्ड प्रिभेन्सन (अफ्रिका सीडीसी) ले जनाएको छ ।
महानिर्देशक जीन क्यासियाले अफ्रिकी महाद्वीपमा वर्षको सुरुदेखि अहिलेसम्म ६५ हजार ७११ एमपक्सका घटनाहरू दर्ता भएका छन । जसमध्ये १४ हजार २४१ जनामा एमपक्स पुष्टि भएको छ । ति मध्ये १ हजार २३७ भन्दा बढीको मृत्यु भएको छ ।
अफ्रिकी सङ्घको विशेष स्वास्थ्य सेवा एजेन्सीको तथ्याङ्क अनुसार गत हप्ता मात्रै, अफ्रिकामा ३ हजार ५४५ नयाँ घटनाहरू दर्ता भएका थिए ।
कासियाले अफ्रिकी महाद्वीपमा चलिरहेको एमपक्स प्रकोपका कारण मानिसहरू अझै मरिरहेका बताए । यसले हालसम्म २० देशहरूलाई प्रभावित पारेको छ ।
एमपक्स पहिलो पटक सन् १९५८ मा प्रयोगशालामा भेटिएको थियो । यो एक दुर्लभ भाइरल रोग हो ।