क्यानडाको ओन्टारियोमा भएको दुर्घटनामा दुई नेपाली विद्यार्थीको मृत्यु, शव नेपाल फर्काउने तयारी
प्रकाशित मिति : फाल्गुन २, २०८० बुधबार
क्यानडाको ओन्टारियो स्थीत लण्डन सहरमा मंगलबार भएको गाडी दुर्घटनामा दुईजना नेपाली विद्यार्थीको मृत्यु भएको छ । क्यानडामा रहेको नेपाली दूतावासले ओन्टारियोमा भएको दुर्घटनामा २ जना नेपाली बिद्यार्थीहरूको दुःखद निधन भएको उल्लेख गर्दै गहिरो शोकसहित मृतकप्रति श्रद्धाञ्जली एवं दिवङ्गत आत्माको चिरशान्तिको कामना गरेको छ ।
दुर्घटनामा घाइते अन्य बिद्यार्थीहरुको शीघ्र स्वास्थ्य लाभको कामना गर्दै दूतावासले दुखद घडीमा शोकसन्तप्त परिवार तथा आफन्तजनप्रति समवेदना प्रकट गरेको छ । नेपाली राजदूतावास, एनआरएनए क्यानडा, अन्य सामाजिक अभियन्ता, संघसंस्थाहरु तथा क्यानडाका सम्बन्धित निकायहरुको समन्वयमा छिट्टै शब नेपाल फर्काउने प्रयास भइहेको दूतावासले जनाएको छ ।
हाइबरी एभ्येनुमा पर्ने माइल्स रोड र इडर्टन रोड क्षेत्रमा तीन वटा कारहरू दुर्घटनामा पर्दा नेपाली विद्यार्थीहरुको निधन भएको हो । दुर्घटनामा पर्नेहरू उच्च शिक्षा अध्ययन गर्न पुगेका नेपालीहरू हुन् । दुर्घटनामा १० जना घाइते भएको स्थानीय प्रहरीले जनाएको छ । तीमध्ये दुई जनाको अवस्था सिकिस्त रहेको जनाइएको छ ।
मृत्यु हुनेमा सिन्धुपाल्चोकका युवक र सोलुखुम्बुको युवती रहेको जनाइएको छ । उनीहरू लण्डनस्थित फेन्सअ अलेजमा अध्ययनरत थिए । स्थानीय एक मोटर पार्ट्स कम्पनीमा आंशिक समय कार्यरत उनीहरू बिहानीको ड्युटी गर्नका लागि उज्यालो नहुँदै कारमा कार्यस्थलतर्फ गइरहेका बेला दुर्घटना भएको जनाइएको छ । उनीहरु दुई वर्षअघि क्यानडा आएका थिए ।
