दलाललाई मोटो रकम बुझाएर विना भिसा अमेरिका आएका सुवास श्रेष्ठको हिराशतमा रहस्यमय मृत्यु
प्रकाशित मिति : कार्तिक २९, २०८० बुधबार
दलाललाई मोटो रकम बुझाएर विना भिसा अमेरिका आएका ३४ बर्षका नेपाली सुवास श्रेष्ठको अध्यागमन हिराशतमा रहस्यमय मृत्यु भएको छ । टेक्सासको कर्नेस काउन्टी इमिग्रेसन प्रोसेसिङ सेन्टरमा आइसको हिराशतमा रहेका श्रेष्ठको सोमबार मृत्यु भएको अमेरिकाको इमिग्रेशन एण्ड कस्टम इन्फोर्समेन्ट एजेन्सी आइसले पुष्टी गरेको छ ।
मृत्युको आधिकारिक कारण पत्ता लगाउन पोस्टमार्टम हुन बाँकी रहेको छ । नेपाली नागरिक श्रेष्ठ गत सेप्टेम्बर २ मा एरिजोनाको लुकभिल नजिकैबाट विना भिसा अमेरिका प्रवेश गरेका थिए । उनी अध्यागमन अधिकारीद्वारा निरीक्षण, भर्ना वा प्यारोल बिना नै अमेरिका प्रवेश गरेको आइसले जनाएको छ ।
यूएस बोर्डर पेट्रोलले उनलाई अध्यागमन र राष्ट्रियता ऐनको सेक्सन २१२ अन्तर्गत शीघ्र देशनिकालाका लागि सूचना र आदेश दिएको थियो । सेप्टेम्बर ९ मा यूएस बोर्डर पेट्रोलले श्रेष्ठलाई इन्फोर्समेन्ट एन्ड रिमुभल अपरेसन सान एन्टोनियोमा स्थानान्तरण गरेको थियो । त्यसपछि उनलाई उनलाई कर्नेस काउन्टी इमिग्रेसन प्रोसेसिङ सेन्टरमा हिरासतमा राखिएको थियो जहाँ उनको अध्यागमन मुद्दा जारी थियो ।
नोभेम्बर १३ मा इन्फोर्समेन्ट एन्ड रिमुभल अपरेसनलाई उनी अचेत भएकोबारे सूचित गरिएको थियो । मेडिकल सहायता पछि श्रेष्ठलाई मृत घोषणा गरिएको थियो । आइसको प्रोटोकलहरूसँग अनुरूप उनको मृत्युबारे होमल्याण्ड सेक्युरिटी, महानिरीक्षकको कार्यालय, र व्यावसायिक उत्तरदायित्वको आइसको कार्यालय लगायतमा उनको मृत्युको बारेमा सूचित गरिएको आइसले जनाएको छ ।
आइसले श्रेष्ठको निधन भएको वासिङ्गटन डीसीस्थित नेपाली दूतावासलाई जानकारी गराएको समेत जनाएको छ । त्यस्तै इन्फोर्समेन्ट एन्ड रिमुभल अपरेसन स्यान एन्टोनियोका कर्मचारीले आफन्तलाई सूचित गरेका छन् ।
आइसले आफ्नो हिरासतमा रहेका सबै सुरक्षित, सुरक्षित र मानवीय वातावरणमा बसोबास गर्ने सुनिश्चित गर्न प्रतिबद्ध रहेको बताएपनि श्रेष्ठको मृत्युबारे अनेक आशंका उब्जिएका छन् । श्रेष्ठ बाह्रबिसे नगरपालिका ८ सिन्धुपाल्चोकका स्थायी बासिन्दा हुन् । सन् १९८९ को जुन ४ मा जन्मिएका उनको मृत्युको कारण केही दिनमा सार्वजनिक हुने अपेक्षा गरिएको छ ।