ओक्लाहोमामा ४ जनाको नेपाली परिवार चढेको गाडी दुर्घटना, आमा र २ बर्षीया छोरीको अवस्था गम्भिर

खसोखास अमेरिका ब्यूरो

---

प्रकाशित मिति : असार २०, २०८० बुधबार

अमेरिकाको ओक्लाहोमामा नेपाली परिवार चढेको गाडीमा सेमी ट्रकले ठक्कर दिंदा परिवारका चारैजना घाइते भएका छन् भने दुईजनाको अवस्था गम्भिर रहेको छ । दुर्घटनामा सन्तोष बर्तौला, श्रीमती श्रृजना पाण्डे, ६ बर्षका छोरा जस बर्तौला र २ बर्षकी छोरी नायला बर्तौला घाइते भएको पारिवारिक श्रोतले जानकारी दिएको छ ।

शनिबार बेलुका ५ बजेतिर दुर्घटनामा घाइते आमा र छोरीको अवस्था गम्भिर रहेको जनाइएको छ । आमाको स्पाइनल कर्ड इन्जुरी भएकाले प्यारालाइसिस अवस्थामा उपचार भइरहेको छ भने छोरीको पनि गम्भिर अवस्थामा आईसीयुमा उपचार भइरहेको छ । सन्तोष बर्तौला र छोरा जस बर्तौलाको पनि शरीरका केही भागका हड्डीहरु टुटेको तर खतरामुक्त अवस्थामा उपचार भइरहेको छ ।

ओक्लाहोमाको शुटोभन्ने स्थानमा गाडी चलाइरहँदा  सेमी ट्रकले ठक्कर दिएपछि घाइते आमाछोरीलाई एयर एम्बुलेन्समार्फत र बाबुछोरालाई एम्बुलेन्समार्फत टल्सामा रहेको सान फ्रान्सिस अस्पतालमा लगिएको थियो । त्यसपछि उसैदिन श्रृजना पाण्डेको घाँटीको सर्जरी गरिएको थियो । छोराको केही दिनमा कस्मेटिक सर्जरी हुनसक्ने अस्पताललाई उद्दृत गर्दै पारिवारिक श्रोतले जानकारी दिएको छ ।

कोलम्बियाको मिजौरीमा बस्दै आएको बर्तौला परिवार केहीसमय अगाडिमात्र अमेरिका आएको हो । झण्डै एकबर्ष अगाडि अमेरिका आएका सन्तोष बर्तौलाले गतबर्षको अक्टोबरमा डिपेन्डेन्टका रुपमा श्रीमती र छोराछोरीलाई अमेरिका ल्याएका थिए । नेपालमा स्थायी घर हेटौडा भएका उनीहरु गत शुक्रबारपछि जुलाई ४ को लामो सप्ताहन्तविदा भएका कारण साथीलाई भेट्न सन्तोष आफैले गाडी चलाएर टेक्सास जाँदै थिए । त्यसैक्रममा बीच बाटोमा दुर्घटना भएको हो ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

गतमहिना टेक्सासको टाइलरमा ६ जना नेपाली चढेको कारलाई पिकअप ट्रकले ठक्कर दिंदा २ जना नेपालीहरुको मृत्यु भएको र अरु ४ जना घाइते भएको घटना सेलाउन नपाउदै यो घटना भएको हो । टेक्सासको दुर्घटनामा ३४ बर्षका बर्षका श्रृजन ज्ञवाली र ११ बर्षका बालक इमेज कार्कीको मृत्यु भएको थियो ।

खराब मौषमपछि घरमा विद्युत आपूर्तिमा अवरोध भएपछि ६ जना नै एउटै गाडीमा चढेर साथीको घरतिर जाँदै गर्दा दुर्घटना भएको थियो । दुर्घटनामा घाइते गंगा कार्कीले सन् २०१८ मा पनि दुर्घटनामा परेर कैयन महिना अस्पतालमा विताउनुपरेको थियो । पुरानो दुर्घटनाबाट स्वास्थ्यलाभ गरिरहेको अवस्थामा नयाँ दुर्घटनाको सामना गर्नुपरेको हो ।

(रायन लाम्गादे र सुस्मिता राईको सहयोगमा)