डेढदशक लामो प्रयासपछि न्युयोर्कका नेपालीहरुको आफ्नै भवनमा नेपाली मन्दिर स्थापना
प्रकाशित मिति : जेष्ठ २४, २०८० बुधबार
झण्डै डेढ दशक लामो अथक प्रयास र लामो प्रतिक्षा पश्चात न्युयोर्कका नेपालीहरुले आफ्नै भवनमा नेपाली मन्दिर स्थापना गर्न सफल भएका छन् । रिजउड नेपाली समाजको अगुवाईमा दुर्गा मन्दिर तथा नेपाली सांस्कृतिक केन्द्रका लागि मे २३ मा आफ्नै भवन खरिद गरेपछि नेपाली मन्दिर स्थापना गरिएको हो ।
संस्थाका अध्यक्ष राजेश भट्टले क्विन्सको रिजउडमा अवस्थित उक्त भवनमा मन्दिर कक्ष, हल, ४ वटा अपार्टमेन्ट र ३ वटा अफिस स्पेश रहेको जानकारी दिएका छन् । उक्त भवन १९ लाख ९० हजार डलरमा खरिद गरेको र संस्थाका केहि सदस्यहरुले पर्सनल ग्यारेन्टी बसी ९ लाख ९० हजार डलर ऋण लिएको उनले बताए ।
यसअघि सन् २०१० र २०१७ मा दुई महापुराण लगाएर मन्दिर स्थापनका लागि विभिन्न संस्था र व्यक्तिहरुले झण्डै साढे २२ लाख डलर रकम दिने प्रतिबद्धता दिएका थिए । अहिलेसम्म लगभग १० लाख डलर उठिसकेको छ भने झण्डै साढे १२ लाख डलर रकम उठ्न बांकी छ।
‘ हामीलाई विश्वास छ हाम्रा साथीहरुले कबुल गरेको रकम चांडै नै उपलब्ध गराउनु हुनेछ,’ अध्यक्ष राजेश भट्टले भने । त्यो रकम आएमा मन्दिरको व्यवस्थापन, भवनको पुर्ननिमाण लगायत धेरै कुरामा सहज हुनेछ।’
न्युयोर्कमा रहेको महावाणिज्यदूतावासका वाणिज्यदूत गणेश अधिकारीले मन्दिरलाई आफ्नै भवनमा ल्याउन सफल भएकोमा सबैलाई बधाई दिएका छन् । संस्थाले गत जनवरी देखि हल भाडामा दिएर विभिन्न कार्यक्रम, पुजाआजा तथा बालबालिकाहरुकमा लागि हरेक आइतबार नेपाली भाषाको पढाई र नृत्य कक्षाहरु संचालन गरिरहेको छ ।