मेरिल्याण्ड संसदबाट दशैं विधेयक पारित, अब हस्ताक्षरका लागि गभर्नरको डेस्कमा
प्रकाशित मिति : चैत्र २८, २०७९ मंगलबार
मेरिल्याण्ड संसदबाट दशैं विधेयक पारित भएको छ । पाँच वर्षको अथक प्रयास र सहकार्यपछि अन्ततः दशैं विधेयक पारित गर्न सफल भएको उल्लेख गर्दै मेरिल्याण्ड राज्य सांसद ह्यारी भण्डारीले खुशी व्यक्त गरेका छन् ।
यो विधेयक मेरिल्याण्ड राज्यका सांसद ह्यारी भण्डारीको नेतृत्वमा निक एलन, कार्ल ज्याक्सन र लेस्ले लोपेजले स्पोन्सर गरेका हुन् । फेबु्रअरीमा अन्तिमपटक ल्याइएको यो विधेयक मार्च २० मा तल्लो सदन हाउस अफ डेलिगेट्सबाट पारित भएको थियो भने सिनेटबाट सोमबार पारित भएको हो । गभर्नरले हरेक वर्ष अक्टोबर ५ लाई दशैं दिवसका रूपमा घोषणा गर्नुपर्ने प्रयोजनका लागि यो विधेयक ल्याइएको हो ।
विधेयक पारित भएपछि भण्डारीले भनेका छन् – ‘यो हामी सबैको लागि ठूलो विजयको दिन हो। पाँच वर्षको अथक प्रयास र सहकार्यपछि हामीले अन्ततः दशैं विधेयक पारित गरेका छौँ । यो अहिले गभर्नरको डेस्कमा छ ।’
भण्डारीले बिललाई वास्तविकता बनाउन सँगै काम गरेका मेरील्याण्ड हाउस र सिनेटमा सहकर्मीहरू प्रति कृतज्ञता व्यक्त गरेका छन् । उनले भनेका छन् – ‘तिनीहरूको समर्पण, प्रतिबद्धता र लगनशीलता बिना, हामी आज यो महत्त्वपूर्ण अवसर मनाउन यहाँ खडा हुने थिएनौं।’
लामो समयदेखि नेपाली समुदायले पुस्तौंदेखि मनाउँदै आएको दशैं पर्वलाई मान्यता नदिइएको उल्लेख गर्दै उनले भनेका छन् – ‘तर अब यो परिवर्तन भएको छ । यो विधेयक पारित भएसँगै हामीले हाम्रा समुदायलाई अद्वितीय र जीवन्त बनाउने परम्परा र चलनहरूको कदर र सम्मान गरेको देखाएको छौँ।’
भण्डारीले भनेका छन् – ‘यो ऐतिहासिक पल मनाऔं । सबैको उज्यालो भविष्य निर्माण गर्न जारी राखौं।’
विधेयकमा भनिएको छ – ‘दशैं नेपालमा उत्पत्ति भएको हो एक चाड हो, दक्षिण एसियाका भागहरु र मेरिल्याण्ड लगायत विश्वभरका दक्षिण एसियाली समुदायहरूमा मनाइन्छ । यो चाड संसार एक परिवार हो भन्ने विश्वास तथा एकता र विविधताको केन्द्रीय सांस्कृतिक मान्यतामा निहित छ जुन अध्यात्मिक संस्कृत वाक्यांश वसुधैव कुटुम्बकमसँग जोडिएको छ ।’
‘यो चाड घटस्थापनादेखि कोजाग्रत पूर्णिमासम्म १५ दिनसम्म मनाइन्छ । यो चाडमा व्यक्तिहरूले वर्षभरि दुष्टता विरुद्धको लडाइमा सद्भाव कायम गर्ने संकल्प गर्छन् ।’ – विधयेकमा उल्लेख छ ।