न्युयोर्कका मेयर र सांसदहरुको उपस्थीतिमा शेर्पा किदुग अमेरिकाले मनायो भब्य ल्होसार
प्रकाशित मिति : फाल्गुन ९, २०७९ मंगलबार
न्युयोर्कका मेयर र सांसदहरुको उपस्थीतिमा शेर्पा किदुग अमेरिकाले भब्य रुपमा ग्याल्पो ल्होसार मनाएको छ । न्युयोर्कको ज्याक्सनहाइटमा रहेको शेर्पा किदुगको गुम्बामा मनाइएको ल्होसारमा न्युयोर्क सिटीका मेयर एरिक आडम्स, अमेरिकाको वासिंटन डिसी संसदमा न्युयोर्कको ६ नम्बर डिस्ट्रिक्टबाट प्रतिनिधित्व गर्ने सांसद ग्रेस मेङ, न्युयोर्क राज्य सांसद स्टेभन रागा, न्युयोर्क सिटीका डेपुटी कमिश्नर दिलिप चौहान लगायतको उपस्थीति रहेको थियो ।
मेयर एरिक आडम्सले ल्होसारको शुभकामना दिदै आफूले कैयन बर्ष अगाडि नेपालको भ्रमणको गरेको उल्लेख गर्दै न्युयोर्कमा ठूलो समुदायलाई पाउनु खुशीको कुरा भएको बताए । नयाँ पुस्ताहरु ल्होसार मनाउन अग्रसर भएको देख्दा खुशी लागेको उनले बताए । मेयर आडम्सले शेर्पा किदुगलाई प्रशंसापत्र प्रदान गरेका थिए भने किदुगकी अध्यक्ष छिरिङ शेर्पाले मेयर आडम्सलाई बुद्धको मूर्ति उपहार दिइन् ।
कार्यक्रममा सांसद ग्रेस मेङले सबैलाई ल्होसारको शुभकामना दिदै ल्होसार कार्यक्रममा मेयरको उपस्थीतिका लागि धन्यवाद दिइन् । न्युयोर्क सिटीका डेपुटी कमिश्नर दिलिप चौहानले ल्होसारको शुभकामना दिदै कोरोना महामारीमा समुदायसँग मिलेर गरेको सहकार्यको स्मरण गरे । त्यस्तै राज्य सांसद स्टेभन रागाले नेपाली समुदायको प्रतिनिधित्व गर्न पाउँदा आफूलाई निकै खुशी लागेको उल्लेख गर्दै ल्होसारको शुभकामना दिए ।
ल्होसारका अवशरमा विभिन्न सांस्कृतिक झाँकीहरु समेत प्रदर्शन गरिएको थियो भने धर्मगुरुहरुले धार्मिक विधिपूर्वक पूजापाठ समेत गरेका थिए । कार्यक्रममा शेर्पा समुदायका साथै न्युयोर्कका अन्य नेपाली संघ सस्थाहरुका प्रतिनिधिहरुको पनि बाक्लो उपस्थीति रहेको थियो ।
पूजा आराधनासँगै शेर्पा समुदायको सांस्कृतिक नाच एवं भेषभूषा प्रदर्शन हुने गरी कार्यक्रमको आयोजना पनि गरिएको थियो । फागुन शुक्ल प्रतिपदाका दिन शेर्पा समुदायले मनाउने सांस्कृतिक पर्व ग्याल्पो ल्होसार शेर्पा किदुग अमेरिकाले हरेक बर्ष विविध कार्यक्रम आयोजना गरी मनाउदै आएको छ ।
नयाँ वर्षका रुपमा अमेरिकाका शेर्पा समुदायले २१५० औँ ग्याल्पो ल्होसार आज बाघ वर्षलाई बिदाइ गरी खरायो वर्षलाई स्वागत गरेर मनाएका हुन् । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र बराह गरी १२ वर्गमा ग्याल्पो ल्होसारलाई विभाजन गरिएको छ । ल्होसार शब्दले नयाँ वर्ष बुझाउँछ । आजदेखि शेर्पा समुदायको २१५० औँ साल सुरु भएको छ ।
ग्याल्पो ल्होसार फागुन शुक्ल प्रतिपदादेखि पूर्णिमासम्म विविध कार्यक्रम आयोजना गरी भव्यरुपमा मनाउन परम्परा शेर्पा समुदायमा छ ।
विगतमा हिमाली क्षेत्रका १२ जिल्लामा मनाइने ग्याल्पो ल्होसार हाल नेपालका २२ जिल्लामा मनाइन्छ भने नेपालबाहिर रहेका डायस्पोराका शेर्पा समुदायले पनि मनाउने गर्छन् । ग्याल्पो ल्होसार शेर्पा समुदायले विविध कार्यक्रम आयोजना फागुन शुक्ल पूर्णिमासम्म मनाउँछन् ।
सबै तस्वीर श्रोत : शेर्पा किदुग अमेरिका