दोहाबाट उडेको कतार एयरवेजको विमान केही सेकेण्डले पानीमा खस्नबाट बच्यो
प्रकाशित मिति : २७ माघ २०७९, शुक्रबार
दोहाबाट कोपेनहेगनका लागि उडेको कतार एयरवेजको उडान केही सेकेण्डले पानीमा खस्नबाट बचेको खुलासा भएको छ । जसका कारण विमानमा रहेका यात्रुहरू त्रसित र आतंकित भएका छन् ।
त्यस समय विमानमा सवार एक यात्रु र अनुभवी उड्डयन विशेषज्ञका अनुशार कतार एयरवेजको उडान केही सेकेण्डले पानीमा ठोक्किनबाट बचेको थियो । यो घटना जनवरी १० मा दोहाबाट कोपेनहेगनका लागि उडेको कतार एयरवेजको क्युआर १६१ उडानमा भएको थियो।
उड्डयन ट्र्याकर वेबसाइटमा प्रकाशित डाटाले कसरी बोइङ ७८७ -८ ड्रीमलाइनर जेटले टेक अफ पछि प्रति सेकेन्ड ५० फिटको दरमा खस्नु अघि १८५० फिट उचाई लियो भन्ने उल्लेख गरिएको छ ।
पाइलटले विमानको नियन्त्रण फिर्ता लिनु अघि विमान पानीभन्दा १७ सेकेन्ड वा ८५० फिटमाथि झरेको थियो । विमान लगभग ७० सेकेन्डसम्म अनियन्त्रित भएको थियो । को पाइलटको गल्ती थाहा पाउनेबित्तिकै केही सेकेन्डमा नै कप्तानले विमानलाई नियन्त्रणमा लिएका हुन् ।
जुनियर पाइलट अन्धकारमा स्थितिगत चेतना हराएको अवस्थाबाट पीडित भएको थियो, जसको परिणामस्वरूप विमान तलतिर झरेको तथा फ्ल्याप गतिले सीमा नाघेको विज्ञहरूले बताएका छन् ।
यात्रुहरु आत्तिएर चिच्याएका थिए । केही यात्रुले बान्ता समेत गरेका थिए ।
पाइलटले म्यानुअल रूपमा र उडान निर्देशकको सहायता बिना विमान उडान गरिरहेको जनाइएको छ । क्याप्टेनले विमानको नियन्त्रण फिर्ता लिएपछि बाँकी उडानमा भने कुनै समस्या भएन । विमान आफ्नो यात्रा पूरा गरेर कोपेनहेगनमा सुरक्षित अवतरण भएको थियो ।
कतार एयरवेज यो घटना बारे सचेत रहेको तथा यो तुरुन्तै अधिकारीहरूलाई रिपोर्ट गरिएको जनाएको छ । घटनाबारे आन्तरिक अनुसन्धान भइरहेको जनाएको छ।
कतार एयरवेजमा नेपालीहरुले पनि उल्लेख्य रुपमा यात्रा गर्दै आएका छन् । तर यो विमानमा कतिजना नेपाली थिए भन्नेबारे केही खुलेको छैन । यद्यपी डेनमार्कमा बस्ने नेपालीहरुको संख्या उल्लेख्य हुने भएकाले र प्राय डेनमार्कको उडानमा केही नेपालीहरुसमेत हुने भएकाले यो उडानमा पनि नेपालीहरु हुनसक्ने अनुमान गरिएको छ ।