टर्की भूकम्प: मृतकको संख्या २० हजार नाघ्नसक्ने विश्व स्वास्थ्य संगठनको चेतावनी
प्रकाशित मिति : माघ २३, २०७९ सोमबार
सिरियाको सीमानजिकैको दक्षिणपूर्वी टर्कीमा गएको शक्तिशाली भूकम्पबाट मृत्यु हुनेको संख्या आठ गुणा बढ्न सक्ने विश्व स्वास्थ्य संगठनले चेतावनी दिएको छ । सोमबार बिहान पहिलो भूकम्प गएपछि हाल २६ सयभन्दा बढी मानिसको मृत्यु भइसकेको तथ्यांक आएको छ ।
टर्कीमा मृत्यु हुनेको संख्या १,६५० नाघेको छ भने सिरियामा १,००० जनाको मृत्यु भएको पुष्टि भएको छ। टर्कीमा कम्तिमा १० हजार र सिरियामा २ हजार जना घाइते भएका छन् । ती संख्या पनि निरन्तर बढ्दै गएको छ । उद्धारकर्ताहरू चिसो र हिउँ परेको अवस्थामा भग्नावशेषहरुमा बाँचेकाहरू खोजिरहेका छन्।
सोमबार टर्की र सिरियाका केही भागहरूमा मानिसहरू सुतिरहेका बेला आएको ७ दशमलव ८ म्याग्नीच्युडको भूकम्पले भवनहरू समतल बनाएको छ ।
स्थानीय समय अनुसार बिहान ४ बजेर १७ मिनेटमा सिरियाको सिमाना नजिक टर्कीको गाजिएन्टेपको उत्तरमा भूकम्प आएपछि धेरै मानिस ध्वस्त भवनमुनि फसेकाले मृत्यु हुनेको संख्या बढ्न सक्ने अधिकारीहरूले चेतावनी दिएका छन्। साइप्रस, लेबनान र इजिप्टमा पनि भूकम्पको धक्का महसुस गरिएको थियो।
विश्वभरका देशहरूले विशेषज्ञ टोली, स्निफर कुकुर र उपकरणहरू सहित उद्धार प्रयासहरूलाई मद्दत गर्न सहयोग पठाइरहेका छन्।उद्धारकर्ताहरूले भग्नावशेषमा बढी पीडितहरू फेला परेकाले मृतकको संख्या आठ गुणासम्म बढ्न सक्ने डब्लूएचओले चेतावनी दिएको छ।
सोही क्षेत्रमा सोमबार दिउँसो ७ दशमलव ५ म्याग्निच्युडको दोस्रो भूकम्प पनि गएको युएसजीएसले जनाएको छ । त्यसपछि कयौं शक्तिशाली पराकम्पन पनि महसुस गरिएको छ ।
टर्की विश्वको सबैभन्दा सक्रिय भूकम्पीय क्षेत्र मध्ये एक हो। सन् १९९९ मा एक घातक भूकम्पले उत्तर पश्चिममा १७ हजार भन्दा बढीको ज्यान लिएको थियो । टर्कीको पूर्वी एर्जिनकान प्रान्तमा ३३,००० मानिसको ज्यान गएको देशको सबैभन्दा ठूलो भूकम्प सन् १९३९ मा भएको थियो।
उत्तरपश्चिमी सिरियाको विपक्षी नियन्त्रित क्षेत्रहरूमा विनाशकारी भूकम्पको क्षतिका रिपोर्टहरू आएका छन् । जहाँ युद्धबाट विस्थापित लाखौं मानिसहरू सघन जनसंख्या भएका शहरहरूमा बस्छन्। गाजियन्टेप र यसको वरपरका क्षेत्रहरूमा लगभग १२ वर्षको युद्धबाट विस्थापित भएका हजारौं सिरियाली शरणार्थीहरू बस्दै आएका छन् ।
भूकम्पबाट व्यापक जनधनको क्षति भएपछि विश्वका नेताहरूले शोक व्यक्त गर्दै सहयोगका लागि अग्रसर भएका छन् । यसै बीच टर्कीले राहत र उद्धारकार्यमा सहयोग गर्न विश्वसमुदाय सँग आग्रह गरेको छ । टर्कीको प्रकोप र आपतकालीन व्यवस्थापन एजेन्सीले तत्काल राहत र सहायता परिचालन गर्न अन्तरराष्ट्रिय समुदायलाई आह्वान गरेको हो ।
टर्कीका राष्ट्रपति रेसेप तैयप एर्दोगानले ट्वीटमार्फत देशका धेरै भागहरूमा प्रभावहरू महसुस गरिएको र भूकम्पबाट प्रभावित क्षेत्रमा तुरुन्तै खोज र उद्धार टोलीहरू पठाइएको बताएका छन् ।
अमेरिकाका राष्ट्रिय सुरक्षा सल्लाहकार ज्याक सुलिभानले एक इमेल विज्ञप्तिमा विनाशकारी भूकम्पको रिपोर्टबाट अमेरिका अत्यन्तै चिन्तित भएको बताएको छ । अमेरिका आवश्यक कुनै पनि र सबै सहायता प्रदान गर्न तयार रहेको उनले बताएका छन् ।
अमेरिकी राष्ट्रपति बिडेनले युएसएआईडी र संघीय सरकारका अन्य साझेदारहरूलाई सबैभन्दा प्रभावितहरूलाई मद्दत गर्न अमेरिकी सहायता विकल्पहरूको मूल्याङ्कन गर्न निर्देशन दिएका छन् ।
वरिष्ठ अमेरिकी अधिकारीहरूले उनीहरूको टर्की समकक्षहरूसँग अमेरिकी सहायता समन्वय गर्न पुगेका र अमेरिका समर्थित मानवीय साझेदारहरूले सिरियामा पनि त्यस्तै गरिरहेका सोमबार एक विज्ञप्तिमा बाइडेनले बताएका छन् ।
बाइडेनले प्रियजनहरू गुमाएकाप्रति गहिरो समवेदना व्यक्त गर्नुका साथै घाइतेहरुको स्वास्थ्यलाभको कामना गरेका छन् ।