अमेरिकी आकाशमा उडिरहेको चिनियाँ जासुसी बेलुन अमेरिकाले किन खसालेको छैन ?
प्रकाशित मिति : माघ २०, २०७९ शुक्रबार
अमेरिकी आकाशमा उडिरहेको चिनियाँ जासुसी बेलुन अमेरिकाले किन खसालेको छैन भन्नेबारे प्रश्न उठेको छ । अमेरिका र क्यानडाले अमेरिकाको उत्तरी भागको आकाश माथि उडिरहेको एक संदिग्ध चिनियाँ जासुसी बेलुनलाई निगरानी गर्न जारी राखेपनि यसलाई नखसालेकाले यसबारे प्रश्न उठेको हो । बेलुन हाल व्यावसायिक हवाई ट्राफिक भन्दा माथिको उचाइमा यात्रा गरिरहेको जनाइएको छ ।
अधिकारीहरूका अनुशार बेलुन भन्दा तल अमेरिकाको संवेदनशील क्षेत्र रहेको छ । यो बेलुन मोन्टानाको आकाशमा देखिएको छ, जसको तल अमेरिकी सेनाको भूमिगत अन्तरमहाद्वीपीय ब्यालिस्टिक मिसाइल च्याम्बर रहेको छ ।
जसका कारण अधिकारीहरूले बेलुन खसाल्दा झर्ने भग्नावशेषबाट हुने सम्भावित क्षतिको तुलनामा बेलुन आकाशमा रहदा हुने जोखिम कम भएको निष्कर्ष निकालेका छन् । चीनले पहिले नै पृथ्वीको अक्षमा प्रयोग गरिरहेको जासूस उपग्रहहरू भन्दा बढी विवरण संकलन गर्ने क्षमता बेलुनमा नभएको निष्कर्ष अमेरिकाको छ ।
यसले अमेरिकी भूभागमा रहेका व्यक्तिहरूलाई पनि कुनै भौतिक खतरा भएको अमेरिकाले मूल्यांकन गरेको छैन । साथै यसले नागरिक उड्डयनलाई खतरामा पार्ने मूल्याङ्कन पनि छैन। यसले खुफिया पक्षमा उल्लेखनीय रूपमा बढेको खतरा उत्पन्न गर्ने पनि अमेरिकी मूल्याङ्कन छैन ।
अमेरिकी रक्षा मन्त्रालयले बुधबार मोन्टानामा गोली हानेर खसाल्ने विचार गरेपनि त्यसबाट जमिनमा रहेका व्यक्तिलाई क्षति हुनसक्ने भएकाले खसाल्ने निर्णय नगरेको जनाइएको छ।
तर यसको मतलब बेलुनलाई खसाल्नै नसकिने नरहेको अमेरिकी अधिकारीहरुले बताएका छन् । यदि जोखिम परिवर्तन भएमा बेलुनलाई के गर्ने भन्ने विकल्पहरु अमेरिकासँग रहेको रक्षा अधिकारीहरुले बताएका छन् ।
यसैबीच अमेरिकामा संदिग्ध चिनियाँ जासूस बेलुन देखिएपछि अमेरिकी विदेशमन्त्री एन्टोनी ब्लिन्केनको बेइजिङको यात्रा स्थगित भएको छ । स्थगनले वाशिंगटन र बेइजिङ बीचको तनावमा महत्त्वपूर्ण नयाँ चरण देखिएको छ ।
अमेरिकी विदेशमन्त्रीको यात्रा गत वर्षको अन्तमा बालीमा सी जिनपिङसँग राष्ट्रपति जो बाइडेनको भेटपछिको श्रृंखला रहेको थियो ।
ब्लिन्केन, राष्ट्रपति जो बाइडेन र अन्य शीर्ष राष्ट्रिय सुरक्षा अधिकारीहरू बीचको उच्च स्तरीय वार्तालाप पछि विदेशमन्त्री एन्टोनी ब्लिन्केनको चीन भ्रमण स्थगित गर्ने निर्णय गरिएको हो ।
ह्वाइट हाउसका अधिकारीहरूले नोभेम्बरमा चिनियाँ राष्ट्रपति सी जिनपिङसँग बाइडेनको भेटपछि अमेरिका र चीनबीचको सम्बन्धमा सुधार भएको देखेका थिए। अहिलेको यात्रा स्थगन भएपनि बाइडेन र सीबीच अर्को केही महिनामा फेरि कुरा हुनसक्ने अधिकारीहरुले बताएका छन् ।
अमेरिकी आकाशमा देखिएको बेलुन आफ्नो भएको स्वीकार गर्दै चीनले मौसम अनुसन्धानका लागि प्रयोग गरिएको दावी गरेको छ । अमेरिका यो बेलुन जासुसी भएको दावीबाट पछाडि हटेको छैन । अमेरिकाको आकाशमा चीनको बेलुन देखिएपछि बेइजिङ र वाशिङटनबीचको तनावपूर्ण सम्बन्धलाई थप तनावपूर्ण बनाएको छ ।
शुक्रबार ढिलो एक विज्ञप्तिमा चिनियाँ विदेश मन्त्रालयले बेलुन मुख्यतया मौसम अनुसन्धानको लागि प्रयोग गरिएको बताएको छ । मन्त्रालयले बेलुनको सीमित स्टेयरिङ क्षमताहरू भएको र हावाको कारणले आफ्नो योजनाबद्ध मार्गबाट टाढा गएको बताएको छ ।
अमेरिकी वायुक्षेत्रमा बेलुनको अनपेक्षित प्रवेशप्रति चीनले दुख प्रकट गरेको छ । चीनले वक्तव्यमा कसैको नियन्त्रणभन्दा बाहिरका घटनाहरूलाई सन्दर्भ गर्न प्रयोग गरिने कानुनी शब्दलाई उद्धृत गरेको छ ।
कभर तस्वीरमा मोन्टानामा रहेको च्याम्बरमा रहेको मिसाइल । यही क्षेत्रको माथि बेलुन उडिरहेको छ । स्रोत: विकिमीडिया कमन्स
