पाकिस्तानको पेशावरमा नमाज पढिरहेका प्रहरीमाथि आक्रमण, ५९ जनाको मृत्यु
प्रकाशित मिति : माघ १६, २०७९ सोमबार
पाकिस्तानको पेशावरस्थित एक मस्जिदमा नमाज पढिरहेका प्रहरीलाई लक्षित गरी भएको आत्मघाती आक्रमणमा परी कम्तीमा ५९ जनाको मृत्यु भएको छ । यो मस्जिद प्रहरी मुख्यालय क्षेत्रमा रहेको थियो जहाँ सहरको कडा सुरक्षा व्यवस्था हुन्छ ।
घटनापछि पाकिस्तानका प्रधानमन्त्री शहबाज शरीफले पत्रकारसँग कुरा गर्दै भने, ‘आतंकवादीहरूले पाकिस्तानको रक्षा गर्नेहरूलाई निशाना बनाएर डर पैदा गर्न चाहन्छन्।’ सुरुमा, एक पाकिस्तानी तालिबान कमाण्डरले घटनाको जिम्मेवारी लिएको थियो, तर केही समय पछि संगठनले आक्रमणको पछाडि इन्कार गर्यो।
चरमपन्थी समूहले नोभेम्बरमा पाकिस्तानसँगको युद्धविराम तोडेको थियो र त्यसयता हिंसा बढ्दै गएको छ। डिसेम्बरमा पेशावरको एक प्रहरी चौकीमा हमला भएको थियो । अस्पतालका प्रवक्ताले बीबीसीलाई बताएअनुसार अहिलेसम्म ५९ जनाको मृत्यु भएको पुष्टि भएको छ भने १५७ जना घाइते भएका छन् ।
पेशावरका प्रहरी प्रमुख मोहम्मद एजाज खानले स्थानीय सञ्चारमाध्यमसँग कुरागर्दै भनेका छन्, ‘घटनाको समयमा उक्त क्षेत्रमा ३०० देखि ४०० प्रहरी उपस्थित थिए।’
मस्जिदको क्षेत्र शहरको सबैभन्दा नियन्त्रित क्षेत्रहरू मध्ये एक हो, पुलिस मुख्यालय, गुप्तचर विभाग र काउन्टर-टेररिज्म ब्यूरोको कार्यालय रहेको छ ।
प्रधानमन्त्री शरीफले आक्रमण पछाडिको ‘इस्लामसँग कुनै सरोकार नभएको’ बताए । उनले भने, ‘आतंकवादविरुद्ध सिंगो देश एकजुट छ।’स्थानीय समय अनुसार दिउँसो करिब १: ३० बजे प्रार्थनाको समयमा विस्फोट भएको हो ।-बिबिसिबाट