क्यानडामा सामूहिक छुरा प्रहार गर्ने एकजना संदिग्ध मृत फेला, अर्का अझै फरार
प्रकाशित मिति : भाद्र २०, २०७९ सोमबार
क्यानाडाली प्रहरीले सास्काचेवान प्रान्तमा सामूहिक छुरा प्रहार गर्ने एकजना संदिग्धलाई सोमबार मृत फेला पारेको छ । अर्को संदिग्ध उसको भाइ अझै फरार रहेको र घाइते भएको हुनसक्ने अधिकारीहरूले बताएका छन् ।
दाजुभाइ डेमियन र माइलेस स्यान्डरसनले आइतबार सास्काचेवानमा अन्धाधुन्द छुरा प्रहार गरेर १० जनाको हत्या र १८ जनालाई घाइते बनाएका थिए । यो आक्रमण क्यानाडाको आधुनिक इतिहासमा सबैभन्दा घातक आक्रमण भएको जनाइएको छ ।
केही पीडितहरूलाई लक्षित गरेर आक्रमण गरिएको थियो भने केहीलाई अन्धाधुन्द आक्रमण गरिएको थियो । पीडितहरूमा दुई सन्तानकी आमा ७७ वर्षीया विधवा समेत थिइन् । आक्रमणकारीको खोजीमा सयौं पुलिस अफिसरहरू संलग्न भएका छन् ।
प्रहरीले ३१ वर्षीय डेमियन स्यान्डरसनलाई जेम्स स्मिथ क्री नेसनको घाँसे क्षेत्रमा मृत फेला पारेका थिए । उसलाई आफ्नै भाइले मारेको आशंका गरिएको छ ।
३० बर्षीय माइल्स स्यान्डरसन अझै पनि फरार रहेको र घाइते भएको हुनसक्ने तथा उपचार खोजिरहेको हुनसक्ने प्रहरी अधिकारीले एक पत्रकार सम्मेलनमा बताए । आक्रमणकारीमध्ये एकको मृत्युपछि अब उक्त घटनामा मृतकको संख्या ११ पुगेको छ भने घाइतेको संख्या १९ पुगेको छ ।