तीनमहिनामा ३१५३ नेपालीलाई अमेरिकाको ग्रिनकार्ड, १० बर्षमा १ लाख बढी
प्रकाशित मिति : बैशाख २०, २०७९ मंगलबार
आर्थिक बर्ष २०२२ को पहिलो तीन महिनामा ३१५३ जना नेपालीहरुलाई अमेरिकाको ग्रिनकार्ड प्रदान गरिएको छ । अमेरिकी सरकारको डिपार्टमेन्ट अफ होमल्याण्ड सेक्युरिटीका अनुशार यो संख्या अमेरिकामै रहेर ग्रिनकार्डमा स्टाटास समायोजन गर्ने र अमेरिकामा आप्रवासी भिसामा आउनेहरुको हो ।
७७८ जनाले अमेरिकामा नै बसेर स्टाटस समायोजन गरेर ग्रिनकार्ड प्राप्त गरेका छन् । २३७५ जना अमेरिकामा आप्रवासी भिसामा आउनेहरु हुन् । अमेरिकामा आप्रवासी भिसामा आउनेहरुले सामान्यतया अमेरिका प्रवेश गरेको एकमहिनामा ग्रिनकार्ड प्राप्त गर्छन् ।
आर्थिक बर्ष २०२० मा ७ हजार ८ सय ४७ जना नेपालीहरुले अमेरिकाको ग्रिनकार्ड प्राप्त गरेका थिए । कोरोनाको महामारीका कारण २०२० मा ग्रिनकार्ड पाउने नेपालीहरुको संख्या कम भएको थियो ।
आर्थिक बर्ष २०२० मा ग्रिनकार्ड पाउने नेपालीहरुमा सबैभन्दा धेरै शरणार्थीका रुपमा २७०५ जना रहेका छन् दोश्रोमा अमेरिकी नागरिकका दम्पत्ति, २१ बर्ष मुनीका छोराछोरी र बाबुआमा १७९१ जनाले ग्रिनकार्ड प्राप्त गरेका छन् । रोजगारमा आधारित ग्रिनकार्ड पाउनेहरु १७४९ र डिभीमा आधारित ग्रिनकार्ड पाउनेहरु १७४३ रहेका छन् ।
आर्थिक बर्ष २०१९ मा १० हजार २ सय १ जनाले, २०१८ मा ११ हजार ९० सय ५३ जनाले, २०१७ मा १२ हजार ८ सय ५१ नेपालीहरुले अमेरिकाको ग्रिनकार्ड पाएका थिए ।
आर्थिक बर्ष २०१६ मा १२ हजार ८ सय ५१ र आर्थिक बर्ष २०१५ मा १२ हजार ९ सय २६ जना नेपालीहरुले अमेरिकाको ग्रिनकार्ड पाए । आर्थिक बर्ष २०१४ मा १२ हजार ३ सय ५७, आर्थिक बर्ष २०१३ मा १३ हजार ४६, आथिक बर्ष २०१२ मा ११ हजार ३ सय १२ र आर्थिक बर्ष २०११ मा १० हजार १ सय ६६ जना नेपालीहरुले अमेरिकाको ग्रिनकार्ड पाए ।
यसरी आर्थिक बर्ष सन् २०११ देखि सन् २०२० सम्मको १० बर्षको अवधिमामात्र १ लाख २ हजार ५ सय ६९ जना नेपालीहरुले अमेरिकाको ग्रिनकार्ड पाइसकेका छन् । सन् १९८९ देखि सन् २००२ सम्म ग्रिनकार्ड पाउने नेपालीहरुको संख्या ५ हजार ७ सय ७८ रहेको छ । त्यस्तै आर्थिक बर्ष सन् २००३ देखि सन् २०१० सम्म अमेरिकाको ग्रिनकार्ड पाउने नेपालीहरुको संख्या ३१ हजार २२ रहेको छ ।
डिपार्टमेन्ट अफ होमल्याण्ड सेक्युरिटीको यो तथ्यांक अनुशार अमेरिकामा ग्रिनकार्ड प्राप्त गर्ने नेपालीहरुको संख्या आर्थिक बर्ष १९८९ देखि २०२० सम्म १ लाख ३९ हजार ३ सय ६९ रहेको छ । १९८९ भन्दा अगाडि अमेरिकामा झण्डै २ हजार नेपालीहरुमात्र रहेका थिए । यसरी आर्थिक बर्ष २०२१ को तथ्यांक समेत जोड्दा अमेरिकामा ग्रिनकार्ड पाउने नेपालीहरुको संख्या झण्डै डेढलाख पुगेको छ । त्यसमध्ये झण्डै ५५ हजारले अमेरिकी नागरिकता लिइसकेका छन् ।