कामदार भिसाबाहेक सबै आवेदनमा युएससीआईएसका सबै सर्भिस सेन्टरले क्रेडिट कार्ड स्वीकार्न सुरु
प्रकाशित मिति : फाल्गुन २१, २०७८ शनिबार
कामदार भिसा एचवान बी र एचटु एका लागि आवेदन फर्म आई १२९ बाहेक अन्य सबै आवेदनमा युएससीआईएसका सबै सर्भिस सेन्टरहरुले क्रेडिट कार्डबाट रकम स्वीकार्न सुरु गरेका छन् । अर्थात् अबदेखि सबै सर्भिस सेन्टरमा एचवान बी र एचटु ए आवेदन बाहेक अन्य सबैमा क्रेडिट कार्डबाट आवेदन शुल्क तिर्न सकिने भएको छ ।
फर्म जी १४५० भरेर क्रेडिट कार्ड प्रयोगका लागि अनुमति दिइसकेपछि युएससीआईएसले क्रेडिट कार्डको विवरण प्रयोग गरेर आवेदन शुल्क स्वीकार गर्नेछ । क्रेडिट कार्ड पेमेन्ट अन्तरगतको बृहत कार्यक्रम अन्तरगत सबै सर्भिस सेन्टरमा क्रेडिट कार्ड स्वीकार गर्न सुरु गरिएको युएससीआईएसले जनाएको छ ।
सुरुमा युएससीआईएसले यो कार्यक्रम नेब्रास्का सर्भिस सेन्टरबाट सुरु गरेको थियो । पछि यो कार्यक्रम टेक्सास, भर्मोन्ट र क्यालिफोर्निया सर्भिस सेन्टरमा विस्तार गरिएको थियो । युएससीआईएसका लकबक्समा फाइल गरिएका र सर्भिस सेन्टरमा फाइल गरिएका आवेदनमामात्र अमेरिकी बैंकबाट जारी भएका क्रेडिट कार्डमार्फत रकम तिर्न सकिन्छ ।
युएससीआईएसले अमेरिकाबाहेकका विदेशी बैंकबाट जारी क्रेडिट कार्ड स्वीकार गर्दैन । त्यस्तै क्रेडिट कार्डबाट शुल्क तिर्दा अतिरिक्त रकम पनि तिर्नुपर्दैन । भिसा, मास्टर कार्ड, अमेरिकन एक्सप्रेस र डिस्कभरमार्फत शुल्क तिर्न सकिन्छ ।
क्रेडिटकार्डबाट रकम तिर्दा प्रयाप्त रकम भएको सुनिश्चित गर्न युएससीआईएसले सुझाव दिएको छ । यदि पहिलो प्रयासमा क्रेडिट कार्ड अस्वीकृत भएमा दोश्रो पटक प्रयास नगर्ने र आवेदन अस्वीकार गर्ने युएससीआईएसले प्रष्ट पारेको छ ।
क्रेडिट कार्डबाट शुल्क तिर्दा फर्म जी १४५० भरेर हस्ताक्षर गरेर आवेदनको सुरुमा राखेर पठाउनुपर्छ । एकैपटक धेरै आवेदन पठाइएको छ भने हरेक आवेदनका लागि फरक फरक जी १४५० फर्म भरेर हस्ताक्षर गरेर पठाउनुपर्छ । तर आवेदन शुल्क र बायोमेट्रिक शुल्क भने एउटै जी १४५० बाट पनि तिर्न सकिन्छ ।
धेरै आवेदन सहितको प्याकेजमा एउटामात्र जी १४५० फर्म भरेर पठाएको खण्डमा पूरै प्याकेज नै अस्वीकार गर्ने युएससीआईएसले जनाएको छ । त्यस्तै धेरै आवेदनका लागि मनी अर्डर, चेक र क्रेडिट कार्ड स्वीकृति पठाएको खण्डमा पनि आवेदन अस्वीकार गरिने युएससीआईएसले जनाएको छ ।
तर एउटा आवेदनमा एउटाभन्दा बढी क्रेडिट कार्ड भने प्रयोग गर्न सकिन्छ । यसरी प्रयोग गर्दा फरक फरक क्रेडिट कार्ड वा गिफ्ट कार्डका लागि फरक फरक जी १४५० फर्म भर्नुपर्छ भने कुन कार्डबाट कति रकम चार्ज गर्ने भन्नेबारे पनि प्रष्ट उल्लेख गर्नुपर्छ ।
कहिलेकाँही क्रेडिट कार्डबाट रकम तिर्दा क्रेडिट कार्ड जारी गर्ने बित्तिय संस्थाले त्यसबारे क्रेडिट कार्ड प्रयोगकर्तालाई अलर्ट पठाउने र अलर्टको समयमै रेस्पोन्स नगर्दा ट्रान्जेक्सन अस्वीकृत हुने भएकाले युएससीआईएसलाई क्रेडिट कार्डबाट रकम तिर्दा सजगता अपनाउन कानून व्यवसायीहरुले सुझाव दिएका छन् । क्रेडिट कार्ड कम्पनीले अलर्ट पठाइसकेपछि स्वीकार गरेको खण्डमा समेत कहिलेकाँही दोश्रो प्रयासका लागि क्रेडिट कार्ड कम्पनीले सुझाव दिन्छ, तर युएससीआईएसले भने दोश्रो पटक प्रयास गर्दैन ।
क्रेडिट कार्ड पेमेन्टबारे विस्तृत जानकारीका लागि यहाँ क्लीक गर्नुहोला ।