कोरोनाविरुद्धको भ्याक्सिनको चौथो डोजबारे विचार गर्दै अमेरिका
प्रकाशित मिति : फाल्गुन ८, २०७८ आईतबार
अमेरिकाको खाद्य तथा औषधि नियामक एजेन्सी एफडीएले कोरोनाविरुद्धको भ्याक्सिनको चौथो डोजबारे सावधानीका साथ विचार गरिरहेको जनाएको छ । आगामी केही महिनामा एमआरएएन भ्याक्सिन मोडेर्ना वा फाइजरको दोश्रो बुस्टर डोजबारे एफडीएले विचार गरिरहेको हो ।
एफडीए प्रवक्ता एलिसन हन्टका अनुशार एफडीएले बुस्टर डोजको सम्भावित उपयोग र संरचनाको मूल्याङ्कन गर्न महामारी र भेरियन्ट सम्बन्धित तथ्यांकहरुको अवलोकन गरिरहेको छ । आगामी बर्षातिर चौथो बुस्टर आवश्यक हुने नहुनेबारे एफडीएएले मूल्यांकन गरिरहेपनि बुस्टर चाहिने विषय अझै सुनिश्चित नभइसकेको जनाइएको छ ।
यदि एफडीएले दोश्रो बुस्टर डोज स्वीकृत गरेको खण्डमा प्रयोगका लागि सीडीसीले पनि अनुमति दिन आवश्यक छ । कोरोनाको ओमिक्रोन भेरियन्ट प्रभाव कम हुँदै गएकाले चौथो डोज आवश्यक नपर्न सक्नेबारे समेत विचार भइरहेको छ । तर आवश्यक परेमा चौथो डोज दिनुपर्ने अमेरिकाका बरिष्ठ सरुवा रोग विशेषज्ञ एन्थोनी फाउचीले बताएका छन् ।
फाइजर र मोडेर्नाले अहिले ओमिक्रोनलाई लक्ष्यीत गरेर कोरोनाविरुद्धका भ्याक्सिन बनाइरहेका छन् । कालान्तरमा उचित संरक्षणका लागि चौथो डोज आवश्यक पर्ने दुबै कम्पनीहरुको विश्वास रहेको छ ।
इजरायलले यस अगाडि नै निश्चित नागरिकहरुका लागि कोरोनाविरुद्धको भ्याक्सिनको चौथो डोज स्वीकृति गरिसकेको छ । स्वीडेनले पनि सोमबारदेखि ८० बर्षभन्दा माथिका उमेरका व्यक्तिका लागि दोश्रो बुस्टर डोज स्वीकृत गरेको छ । सीडीसीका अनुशार प्रतिरोध क्षमता कम भएका अमेरिकनहरु पनि अक्टोबरदेखि दोश्रो बुस्टर डोजका लागि योग्य रहेका छन् ।