बाइडेनले हटाए दक्षिण अफ्रिका लगायतका ८ देशबाट अमेरिका आउनमा लगाइएको रोक
प्रकाशित मिति : पुस १३, २०७८ मंगलबार
अमेरिकी राष्ट्रपति जो बाइडेनले दक्षिण अफ्रिका लगायतका ८ देशबाट अमेरिका आउनमा लगाइएको रोक हटाएका छन् । मंगलबार घोषणा जारी गर्दै बाइडेनले डिसेम्बर ३१ सुरु हुने बित्तिकै लागु हुनेगरी यस्तो प्रतिबन्ध हटाइने घोषणा गरेका छन् ।
यसअगाडि बाइडेनले प्रतिबन्ध हटाउने घोषणा गर्नेबारे ह्वाइट हाउसले बताएको थियो । कोरोनाको ओमिक्रोन भेरियन्टका कारण गत महिना अमेरिकाले विभिन्न ८ वटा देशबाट अमेरिका आउनमा रोक लगाएको थियो ।
प्रतिबन्ध हटाइएसँगै विगत १४ दिनभित्र ती ८ देशमा उपस्थीत भएकाहरुलाई पनि अमेरिका प्रवेशको अनुमति दिइने छ । सीडीसीको सिफारिसपछि यस्तो निर्णय गरिएको ह्वाइट हाउसले जनाएको छ ।
अमेरिकाले गत नोभेम्बर २९ देखि साउथ अफ्रिका, बोत्सावना, जिम्बाबे, नामिबिया, लेसोथो, इस्वाटिनी, मोजाम्बिक र मालावीबाट गैर अमेरिकी नागरिकबाहेकका अन्यलाई अमेरिका आउनमा रोक लगाएका थिए । विगतमा लगाएको प्रतिबन्धले ओमिक्रोन भेरियन्टलाई बुझ्न समय प्राप्त भएको तथा अहिलेका भ्याक्सिनहरुले ओमिक्रोन भेरियन्टबिरुद्ध काम गर्ने पाइएको ह्वाइट हाउस प्रवक्ता मुनोजले बताएका छन् ।