अफगानिस्तानमा रहेका नेपालीलाई तत्काल उद्धार गर्न संसदीय समितिको निर्देशन
प्रकाशित मिति : श्रावण ३१, २०७८ आईतबार
प्रतिनिधिसभाको अन्तर्राष्ट्रिय सम्बन्ध समितिले युद्धग्रस्त अफगानिस्तानमा रहेका नेपालीलाई तत्काल उद्धार सरकारलाई निर्देशन दिएको छ। आइतवार बसेको बैठकपछि समितिले त्यहाँ रहेका नेपालीहरुको तत्काल उद्धारको काम थाल्न निर्देशन दिएको हो।
‘त्यहाँ रहेका नेपालीहरूलाई हवाई उडानमार्फत् उद्धार गर्न सकिन्छ कि अन्य देशमा स्थानान्तर गरी उद्धार गर्न सकिन्छ तत्काल काम थाल्नू,’ समितिको निर्णयमा भनिएको छ।
यसअघि बैठकमा परराष्ट्र सचिव भरतराज पौड्यालले अफगानिस्तानमा जोखिमपूर्ण रहेका नेपालीको अवस्थाबारे बुझ्न तथा उद्धारका लागि परराष्ट्र मन्त्रालयले सहसचिवको नेतृत्वमा समिति गठन गरेको जानकारी दिएका थिए।
पौड्यालका अनुसार काबुल हेर्ने दिल्लीस्थित नेपाली दूतावासले सम्पर्कमा नरहेका नेपालीलाई सम्पर्क गर्न सूचना जारी गर्ने तयारी गरेको छ। उनीहरुले आफ्नोबारेमा अनलाइनमार्फत जानकारी गराउन सक्ने पौड्यालले जानकारी दिए।
अफगानिस्तानको काबुलमा करिब १५ सय नेपाली रहेको अनुमान छ। २०७३/०७४ यता अफगानिस्तानमा काम गर्नका लागि ६ हजार ६३७ नेपालीले स्वीकृति लिएका छन्। यस वर्षको वैशाखदेखि साउन २९ गतेसम्म ३३० जनाले श्रम स्वीकृति लिएर अफगानस्तान गएको तथ्यांकले देखाउँछ।