माओवादी स्थायी कमिटीः साउन ३० भित्र सबै वडा समिति गठन गर्न निर्देशन
प्रकाशित मिति : श्रावण १७, २०७८ आईतबार
नेकपा (माओवादी केन्द्र) ले यही साउन ३० गतेसम्म पार्टीका सबै वडा समिति गठन गरी त्यसको विवरण केन्द्रमा पठाउन केन्द्रीय सदस्यहरुलाई निर्देशन दिएको छ। आइतबार बसेको स्थायी कमिटी बैठकले उक्त निर्देशन दिएको हो।
पार्टी संगठनलाई चुस्त, दुरुस्त तथा व्यवस्थित बनाउन सबै वडासमिति गठन, पुनःगठन गरी यथार्थ विवरण तयार पार्न निर्देशन दिइएको प्रवक्ता नारायणकाजी श्रेष्ठले जानकारी दिए।
पार्टी केन्द्रीय कार्यालय पेरिसडाँडामा बसेको स्थायी कमिटी बैठकले साउन ३० मा बस्ने केन्द्रीय समितिको बैठकमा सो विवरणसहित आउन निर्देश गरेको श्रेष्ठले जानकारी दिए। यसअघि यही साउन २० गतेका लागि तय भएको केन्द्रीय समितिको बैठक थप तयारी गर्नुपर्ने भन्दै १० दिन पर सारिएको हो।
गठबन्धन प्रभावकारी बनाउने निर्णय
माओवादी केन्द्रले पाँच दलीय गठबन्धनलाई थप प्रभावकारी बनाउने निर्णय गरेको छ। संविधान र लोकतान्त्रिक मूल्य र मान्यताका लागि स्थापित भएको गठबन्धनलाई देश र जनताको पक्षमा थप प्रभावकारी बनाउँदै देश र जनताको पक्षमा क्रियाशील बनाउने निर्णय भएको प्रवक्ता श्रेष्ठले जानकारी दिए।
यस्तै, वर्तमान सरकारलाई जनपक्षीय बनाउन आफनो तर्फबाट पहल गर्ने माओवादी केन्द्रले जनाएको छ। बैठकमा अध्यक्ष पुष्पकमल दाहाल ‘प्रचण्ड’ले पछिल्लो राजनीतिक घटनाक्रम, गठबन्धनमा आवद्ध दलसँग भएको छलफल तथा सरकार विस्तारलगायतका विषयमा ब्रिफिङ गरेका थिए।
दार्चुला घटनाको छानबिन गर्न माग
माओवादी केन्द्रले महाकाली नदीमा तुइन तर्ने क्रममा बेपत्ता भएका जयसिंह धामीका विषयमा छानबीन गर्न सरकारसँग माग गरेको छ। यही साउन १५ गते दार्चुलाको व्यास गाउँपालिका–२ खाङदाङ मालघाटबाट तुइनको प्रयोग गरी जयसिंह धामीसहितका व्यक्ति भारततर्फको बाटो हुँदै सदरमुकाम खलङ्गा आउने क्रममा भारतीय एसएसबीका जवानले तुइन काटिदिएकाले धामी महाकाली नदीमा खसेर बेपत्ता भएको समाचार सार्वजनिक भएको थियो। प्रवक्ता श्रेष्ठले सो घटनाको सत्यतथ्य छानबीन गरी भारतीय पक्षसँग गम्भीर आपत्ति जनाउँदै दोषीमाथि कारबाही गर्न सरकारको ध्यानकर्षण गराइएको बताए।
केही दिनभित्रै सरकार विस्तार हुने
माओवादी केन्द्रले केही दिनभित्रै सरकार विस्तार हुने विश्वास व्यक्त गरेको छ। जनता समाजवादी पार्टीले आवश्यक निर्णय गरिसकेको तथा वैधानिकको विषयसमेत टुङ्गिइसकेको र अन्य दललेसमेत आवश्यक निर्णय दिने अन्तिम तयारी गरेकाले सरकार विस्तारमा बिलम्ब नहुने प्रवक्ता श्रेष्ठको भनाइ छ।
गठबन्धनमा सहभागी राष्ट्रिय जनमार्चाले सरकारमा नजाने निर्णय गरिसकेको छ। एमालेको माधवकुमार नेपाल समूहले पनि छिट्टै आफनो निर्णय दिने तयारी गरेको छ। ‘अब धेरै समय लिनुहुँदैन भन्नेमा हामी स्पष्ट छौं। केही दिनभित्रै स्पष्ट निर्णय आउला र आउनुपर्छ’, उनले भने।
मन्त्रिपरिषदमा पार्टीको तर्फबाट पठाउने नेताहरुको बारेमा निर्णय गर्न सोमबार ३ बजे पुनः स्थायी कमिटी बैठक बस्ने प्रवक्ता श्रेष्ठले बताए।