कोरोना संक्रमणबाट बागमती प्रदेशमा सबैभन्दा धेरै मृत्यु
प्रकाशित मिति : श्रावण ४, २०७८ सोमबार
कोरोना संक्रमणका कारण हालसम्म सबैभन्दा धेरै मृत्यु बागमती प्रदेशमा भएको छ। स्वास्थ्य तथा जनसंख्या मन्त्रालयको तथ्यांकअनुसार बागमती प्रदेशमा हालसम्म ४ हजार ८६ जनाको मृत्यु भएको हो।
यस्तै, प्रदेश १ मा १ हजार ३ सय ११, प्रदेश २ मा ७ सय ३८, गण्डकीमा १ हजार ९, लुम्बिनीमा १ हजार ५ सय ७८, सुदूरपश्चिमा ४ सय ४३ र कर्णालीमा ४ सय १७ जनाको मृत्यु भएको छ।
सोमबार थप ३२ जनाको मृत्यु भएको छ। योसँगै नेपालमा कोरोनाका कारण मृत्यु हुनेको संख्या ९ हजार ५ सय ८२ पुगेको छ।
मन्त्रालयका अनुसार २४ घण्टामा २४४५ संक्रमित थपिएका छन्। ७ हजार ८ सय ३३ जनामा पिसिआर विधिबाट र ३ हजार ८ सय ३१ जनामा एन्टिजेन विधिबाट परीक्षण गर्दा उक्त संख्यामा पोजिटिभ देखिएको हो।
त्यस्तै काठमाडौंमा ३३०, भक्तपुरमा ८८ र ललितपुरमा ५६ गरी उपत्यकामा ४७४ संक्रमित थपिएका छन्। काठमाडौंमा सक्रिय संक्रमित ५ हजार ३ सय ११ छन् भने भक्तपुरमा ८ सय ७७ र ललितपुरमा ९ सय ७ सक्रिय संक्रमित छन्।
२४ घण्टामा १ हजार २ सय ५८ जना कोरोना मुक्त भएका छन्। हालसम्म कोरोना संक्रमणबाट ६ लाख ३३ हजार ३३२ जना कोरोनामुक्त भइसकेका छन्।
सोमबारसम्म होम आइसोलेसनमा २३ हजार ३ सय ३४, संस्थागत आइसोलेसनमा २ हजार ५ सय ३, आइसीयुमा ५ सय ६४ र भेन्टिलेटरमा १ सय ५५ जना छन्।
देशभर ५ सयभन्दा बढी सक्रिय संक्रमित र हेका जिल्लाको संख्या १० छ। जसमा मोरङ, झापा, सुनसरी, काठमाडौं, ललितपुर, भक्तपुर, कास्की, रुपन्देही र सुर्खेत छन्।