राष्ट्रपतिबाट संघीय संसदको अधिवेशन आह्वान
प्रकाशित मिति : असार ३१, २०७८ बिहीबार
राष्ट्रपति विद्यादेवी भण्डारीले संघीय संसदका दुवै सदनको अधिवेशन आह्वान गरेकी छिन्। बिहीबार बसेको मन्त्रिपरिषदको सिफारिसमा राष्ट्रपति भण्डारीले संघीय संसदका प्रतिनिधिसभा र राष्ट्रियसभा अधिवेशन आह्वान गरेकी हुन्।
बिहीबारकाे मन्त्रिपरिषद बैठकले साउन ३ गते दिनको ४ बजे संसदको अधिवेशन बोलाउन राष्ट्रपतिसमक्ष सिफारिस गरेको थियो।
‘राष्ट्रपति विद्यादेवी भण्डारीज्यूले मन्त्रिपरिषदको मिति २०७८/३/३१ को सिफारिसमा साउन ३ गते आइतबार दिनको ४ बजे संघीय संसदका दुबै सदन प्रतिनिधिसभा र राष्ट्रियसभाको अधिवेशन आह्वान गर्नुभएको छ,’ राष्ट्रपति कार्यालयका सहायक प्रवक्ता केशवप्रसाद घिमिरेले जारी गरेको विज्ञप्तिमा भनिएको छ।
राष्ट्रपति भण्डारीले निवर्तमान प्रधानमन्त्री केपी शर्मा ओलीको सिफारिसमा जेठ ७ गते मध्यरातमा प्रतिनिधिसभा भंग गरेकी थिइन्। सर्वोच्च अदालतको संवैधानिक इजलासले यही असार २८ गते प्रतिनिधिसभा पुनःस्थापनाको फैसला गरेको थियो।