एमाले : शुक्रबारको केन्द्रीय कमिटी बैठकमा नेपाल पक्ष सहभागी नहुने
प्रकाशित मिति : असार १७, २०७८ बिहीबार
नेकपा एमालेले शुक्रबार बोलाएको केन्द्रीय कमिटी बैठकमा माधव नेपाल समूह सहभागी नहुने भएको छ। विहीबार बसेको नेपाल समूहको स्थायी कमिटी बैठकले यथास्थितिमा शुक्रबार बोलाइएको केन्द्रीय समिति बैठकमा नजाने निर्णय गरेको हो।
बैठकपछि नेता भीम रावलले विधानविपरीत गठित दशौं राष्ट्रिय महाधिवेशन आयोजक कमिटीको बैठक र त्यसले गरेका निर्णयले पार्टी एकतामा अवरोध पुग्ने भएकाले शुक्रबारको बैठकमा सहभागी नहुने निर्णय गरिएको बताए।
उनले एकताका लागि उचित र औपचारिक सार्थक वार्ता र सहमतिको प्रक्रिया अवलम्बन गरिनुपर्ने उल्लेख गर्दै स्थायी कमिटी बैठकबाट आवश्यक निर्णय प्रक्रियाबाट केन्द्रीय कमिटी बैठक बोलाइनुपर्ने आफूहरुको माग रहेको बताए।
उनले पार्टी विधानबमोजिम आयोजक कमिटी गठन गर्ने कुनै व्यवस्था नभएको भन्दै त्यसप्रति आफूहरुको आपत्ती रहेको र केन्द्रीय कमिटी, केन्द्रीय निकायलगायत सबै तहका कमिटीहरु पूर्ववत क्रियाशील हुनुपर्नेमा जोड दिए।
बुधबार बसेको दशौं राष्ट्रिय महाधिवेशन आयोजक कमिटीको बैठकले कमिटी भंग गर्दै शुक्रबारका लागि केन्द्रीय कमिटी बैठक बोलाउने निर्णय लिएकौ थियो। यसलाई नेताहरुले एकता र जेठ २ मा फर्कनका लागि महत्वपूर्ण प्रक्रिया आरम्भ भएकाे क्षणका रुपमा व्याख्या गरेका थिए।