जेठ २ मा फर्कँदै : एमालेको दशौं महाधिवेशन आयोजक कमिटी भंग, शुक्रबार केन्द्रीय कमिटी बस्दै
प्रकाशित मिति : असार १६, २०७८ बुधबार
२०७५ जेठ २ मा फर्कने तयारीस्वरुप एमालेले दशौं राष्ट्रिय महाधिवेशन आयोजक कमिटी भंग गरेको छ। प्रधानमन्त्रीनिवास बालुवाटारमा बसेको कमिटीको अन्तिम बैठकले आयोजक कमिटी भंग गर्दै उक्त कमिटीलाई स्वतः केन्द्रीय कमिटीमा रुपान्तरण गर्ने निर्णय गरेको हो।
एमालेले गत चैत ७ गते दशौं राष्ट्रिय महाधिवेशन आयोजक कमिटी गठन गरेको थियो।
केन्द्रीय कमिटी बैठक शुक्रबार बिहान ११ बजे बोलाइएको छ।
बैठकले तत्कालीन नेकपाको केन्द्रीय कमिटी तथा स्थायी कमिटीमा रहेका तर एमालेको स्थायी कमिटीमा नरहेका नेताहरुलाई स्थायी कमिटीमा मनोनयन गर्ने निर्णय पनि गरेको छ। यसरी मनोनित हुनेहरुमा पूर्व माओवादी नेताहरु रामबहादुर थापा बादल, मणि थापा, टोपबहादुर रायमाझी र लेखराज भट्ट तथा एमालेका रघुवीर महासेठ, वेदुराम भुसाल, विष्णु रिमाल र रघुजी पन्त छन्।
योसँगै वैशाख १२ गतेको महाधिवेशन आयोजक कमिटी तथा जेठ १० को स्थायी कमिटीबाट पार्टीका नेता तथा कार्यकर्तालाई गरिएको कारबाही निष्प्रभावी भएको पार्टी प्रवक्ता प्रदीप ज्ञवालीले बताए।
उनले यो निर्णयबाट पार्टी एकतालाई सुदृढ गर्ने आधार तयार भएको बताए।