संसदीय दलको बैठकमा प्रचण्डले भने–जसपा र कांग्रेससँग मिलेर सरकार बनाउने सम्भावना छ
प्रकाशित मिति : चैत्र ३, २०७७ मंगलबार
नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले जनता समाजवादी पार्टी (जसपा) र नेपाली कांग्रेससँग मिलेर सरकार बनाउने सम्भावना रहेको बताएका छन्। मंगलबार आयोजित संसदीय दलको बैठकमा उनले जसपा र कांग्रेससँग मिलेर सरकार बनाउने सम्भावना रहेको जानकारी गराएको नेता वर्षमान पुनले बताए।
बैठकले प्रचण्डलाई संसदीय दलको नेता चयन गरेको छ। बैठकले नेता देव गुरुङलाई प्रमुख सचेतकमा चयन गरेको नेता पुनले जानकारी दिए। दलको उपनेता र सचेतक भने चयन गर्न बाँकी छ। उनका अनुसार राष्ट्रियसभा संसदीय दलको नेतामा पुनः दिनानाथ शर्मालाई नै चयन गरिएको छ।
बैठकले प्रतिनिधिसभाका चार र राष्ट्रियसभाका दुई गरी छ सांसदलाई स्पष्टीकरण सोध्ने निर्णय पनि गरेको छ। हाल नेकपा (एमाले) मा रहेका उनीहरूसहितका २२ नेतालाई यसअघि स्थायी कमिटी र केन्द्रीय कमिटी बैठकलेसमेत स्पष्टीकरण सोध्ने निर्णय गरिसकेको थियो । सर्वोच्च अदालतले नेपाल कम्युनिष्ट पार्टी (नेकपा) लाई बदर गरी माओवादी केन्द्र र नेकपा (एमाले) पार्टी नै कायम रहेको फैसला सुनाएपछि दुवै दल पदाधिकारी चलनमा लागेको छ ।
बैठकले गत फागुन २३ गते सर्वोच्चले गरेको फैसला बेठिक रहे पनि कार्यान्वयन गर्ने निर्णय पनि गरेको नेता पुनले जानकारी दिए। त्यसपछि माओवादी केन्द्रको संसदीय दलको यो पहिलो बैठक हो प्रधानमन्त्री केपी शर्मा ओलीले अलोकतान्त्रिक कदम चालेको अदालतले फैसला गरिसकेकाले नैतिकरुपमा राजीनामा दिनुपर्ने दलको निष्कर्ष रहेकोसमेत उनले जानकारी दिए।