माओवादी स्थायी कमिटी : अन्य दलसँग छलफल गर्ने जिम्मा प्रचण्ड र श्रेष्ठलाई, सरकारबाट समर्थन फिर्ता लिने निर्णय भएन
प्रकाशित मिति : फाल्गुन २६, २०७७ बुधबार
नेपाल कम्युनिष्ट पार्टी (माओवादी केन्द्र) ले सरकार गठनका लागि अन्य दलसँग छलफल गर्ने जिम्मा अध्यक्ष पुष्पकमल दाहाल ‘प्रचण्ड’ र प्रवक्ता नारायणकाजी श्रेष्ठलाई दिएको छ। बुधबार बसेको स्थायी कमिटी बैठकले अन्य दलसँग छलफल गर्ने जिम्मा प्रचण्ड र श्रेष्ठलाई दिने निर्णय गरेको हो।
माओवादी केन्द्रले नयाँ सरकार बनाउन प्रमुख प्रतिपक्षी नेपाली कांग्रेस र जनता समाजवादी पार्टी (जसपा) को साथ खोजिरहेको छ। अध्यक्ष प्रचण्डले मंगलबार कांग्रेस सभापति शेरबहादुर देउवा र जसपाका नेताहरुसँग छलफल गरेका थिए।
माओवादीले प्रधानमन्त्री केपी ओली नेतृत्वको वर्तमान सरकारबाट समर्थन लिने निर्णय भने गरेको छैन। प्रवक्ता नारायणकाजी श्रेष्ठले सरकारबाट तत्काल समर्थन फिर्ता लिने निर्णय नभएको बताए। उनले नयाँ सरकार बनाउने विषयमा नेपाली कांग्रेस र जसपासँग छलफल भइरहेको बताए।
बुधबारको स्थायी कमिटी बैठकमा सरकार गठनबारे नेपाली कांग्रेस र जसपासँग भएको वार्ताबारे अध्यक्ष प्रचण्डले ब्रिफिङ गरेका थिए।
बैठकले पार्टीको संगठनात्मक स्थितिलाई अध्ययन गरेर प्रतिवेदन बुझाउन गिरिराजमणि पोखरेल, पम्फा भुसाल, जनार्दन शर्मा र वर्षमान पुनसम्मिलित चार सदस्यीय कार्यदल गठन गरेको छ। यसैगरी चैत १ गते केन्द्रीय कमिटी बैठक र २ गते प्रशिक्षणात्मक भेला बोलाउने निर्णय बुधबारको बैठकले गरेको छ।