कन्सुलर प्रमुख माइक मुसीले नेपालमा रहेका अमेरिकी नागरिकसँग अन्तरकृया गर्ने
प्रकाशित मिति : फाल्गुन ६, २०७७ बिहीबार
अमेरिकी दूतावास काठमाडौंका कन्सुलर प्रमुख माइक मुसीले नेपालमा रहेका अमेरिकी नागरिकसँग अन्तरकृया गर्ने भएका छन् । त्यसका लागि आगामी फेब्रुअरी २४ बुधबार भर्चुअल टाउन हलको आयोजना गरिएको छ ।
दिउसो २ बजेदेखि ३ बजेसम्म हुने कार्यक्रममा सहभागिताका लागि नेपालमा रहेका सबै अमेरिकन नागरिकहरुलाई निम्ता दिइएको छ । कार्यक्रममा सहभागी हुनका लागि अग्रिम दर्ता आवश्यक रहेको र फेब्रुअरी २३ मंगलबारसम्म अग्रिम दर्ता गर्न सकिने जनाइएको छ ।
बाइडेन प्रशासनको विदेश नीतिका सन्दर्भमा दूतावासका डेपुटी राजनीतिक तथा आर्थिक प्रमुख मार्क टेम्प्लरले बोल्ने भएका छन् भने कन्सुलर प्रमुख माइक मुसीले स्वागत मन्तब्य दिनेछन् । कार्यक्रममा प्रश्नोत्तर सेसन समेत राखिएको छ ।
कार्यक्रममा सहभागी हुनका लागि नेपालमा रहेका अमेरिकी नागरिक र उनीहरुका दम्पत्ति वा छोराछोरीका लागि दर्ता खुला गरिएको दूतावासले जनाएको छ । सहभागी हुने योजना बनाएकाहरुले पूरा नाम, पासपोर्ट नम्बर र कार्यक्रममा उपस्थीत हुने परिवारका सदस्यहरुको नामसहित दूतावासको इमेल ठेगाना consktm(at)state.gov मा इमेल पठाउन सक्नेछन् ।
त्यसपछि सहभागीले लगइन कोड र कार्यक्रमका बारेमा थप जानकारी प्राप्त गर्नेछन् । कार्यक्रममा सहभागी हुनका लागि दूतावासले नेपालमा बसोबास गरिरहेका वा भ्रमणमा रहेका अमेरिकी नागरिकहरुलाई सुचित गरेको छ ।