जोन्सन एण्ड जोन्सनसँग अमेरिकाले एक बिलियन डलरमा बुक गर्यो १ सय मिलियन भ्याक्सिन
कोरोनाबिरुद्धको भ्याक्सिन बनाइरहेको कम्पनी जोन्सन एण्ड जोन्सनसँग अमेरिकाले एक बिलियन डलरभन्दा धेरै रकममा एक सय मिलियन डोज भ्याक्सिन बुक गरेको छ । जोन्सन एण्ड जोन्सनले बुधबार एक घोषणामार्फत आफूहरुले कोरोनाबिरुद्ध भ्याक्सिन उत्पादन गरेर सुरुका एकसय मिलियन डोज अमेरिकालाई दिने बताएको छ ।
कम्पनीले अहिले प्रारम्भिक चरणमा भ्याक्सिनको परीक्षण गरिरहेको छ भने तेश्रो चरणको बृहत परीक्षण सेप्टेम्बरमा सुरु गर्ने अपेक्षा गरिएको छ । अमेरिका र विश्वब्यापी रुपमा कोरोनाबिरुद्धको भ्याक्सिनको आपतकालिन प्रयोगका लागि आफूहरुले उत्पादनलाई तीब्र पारेको कम्पनीले जनाएको छ ।
अमेरिकाले यसअगाडि जोन्सन एण्ड जोन्सनलाई भ्याक्सिनको विकाशका लागि ४५६ मिलियन डलर प्रदान गरेको थियो । कम्पनीले सन् २०२१ भित्र विश्वब्यापी रुपमा एक बिलियन डोज भ्याक्सिन उत्पादन गर्ने लक्ष्य लिएको छ ।
यदि कोरोनाबिरुद्धको भ्याक्सिन अभियानका क्रममा लगाएको खण्डमा ती भ्याक्सिन लगाउन अमेरिकनलाई कुनै शुल्क तिर्नु नपर्ने अमेरिकी सरकारले एक वक्तब्यमार्फत जनाएको छ । यद्यपी स्वास्थ्यकर्मीहरुले भने भ्याक्सिन लगाउने कार्यका लागि केही शुल्क लिनसक्नेछन् ।
अमेरिकाले सानोफी र ग्यालेक्सीस्मीथलाइनलाई पनि कोरोनाबिरुद्धको १ सय मिलियन डोज भ्याक्सिनका लागि २ दशमलव १ बिलियनसम्म तिर्ने बताएको छ । त्यस्तै अमेरिकाले फाइजर र बायोएनटेकलाई पनि कोरोनाबिरुद्धको प्रभावकारी भ्याक्सिन बनाउन सकेमा एकसयमिलियन डोजका लागि १ दशमलव ९५ बिलियन रकम दिने बताएको छ ।
अमेरिकाले मोडेर्ना र आष्ट्राजेनेकालाई पनि भ्याक्सिनको विकाशका लागि सघाइरहेको छ । यी कम्पनीहरुले पनि अमेरिकालाई भ्याक्सिनका डोजहरु उपलब्ध गराउने बताएका छन् । मोडेर्ना र फाइजरले आफ्तो तेश्रो चरणको बृहत परीक्षण तीसतीस हजारमा सुरु गरिसकेको छ ।
