वेरोजगारी विमाको अतिरिक्त ६ सय डलर पाउने यो नै अन्तिम हप्ता
वेरोजगारी विमा वा महामारी बेरोजगारी सहायता प्राप्त गरिरहेकाहरुले प्राप्त गर्दै आएको अतिरिक्त ६ सय डलर प्राप्त गर्ने यो नै अन्तिम हप्ता रहेको न्युयोर्क डिपार्टमेन्ट अफ लेवरले जनाएको छ । डिपार्टमेन्टका तर्फबाट सबै आवेदकलाई पठाइएको सुचनामा आगामी आइतबार साप्ताहिक प्रमाणिकरणपछि अन्तिम साताका रुपमा अतिरिक्त ६ सय डलर प्राप्त हुने जनाइएको छ ।
गत अप्रिलको पहिलो सातादेखि वेरोजगारी विमा वा महामारी बेरोजगारी सहायता प्राप्त गरिरहेकाहरुले संघीय महामारी बेरोजगारी क्षतिपूर्तिवापत साप्ताहिक ६ सय डलर प्राप्त गर्दै आएका थिए । जुलाई २६ देखि अगस्त १ भित्र साप्ताहिक प्रमाणिकरण गर्नेहरुले अन्तिम हप्ताका रुपमा यो रकम अझै एकपटक प्राप्त गर्नेछन् ।
तर परम्परागत बेरोजगारी विमा रकमको अवधि भने न्युयोर्कमा २६ हप्ताबाट बढाएर ५९ हप्ता बनाइएको छ । अर्थात् परम्परागत बेरोजगारी विमा रकम लाभग्राहीले बढीमा ५९ हप्तासम्ममात्र प्राप्त गर्नसक्नेछन् ।
परम्परागत बेरोजगारी विमा रकमका लागि योग्य नभएका तर महामारी बेरोजगारी सहायता प्राप्त गरिरहेकाहरुले पनि उक्त रकम बढीमा ४६ हप्तासम्म प्राप्त गर्नसक्नेछन् । विगतमा महामारी बेरोजगारी सहायता रकम ३९ हप्तामात्र प्राप्त गर्न सकिने नियम रहेको थियो ।
वेरोजगारी विमा वा महामारी बेरोजगारी सहायता प्राप्त गरिरहेकाहरुले पाएको अतिरिक्त रकमको अवधि बढाउने वा नबढाउने भन्ने सन्दर्भमा संसदमा निचोड निस्कन बाँकी रहेको छ । डेमोक्रेटिक सांसदहरु यो अवधि बढाएर जनवरीसम्म बनाउनुपर्ने पक्षमा रहेका छन् । तर रिपब्लिकहरु भने यो अवधि बढाउँदा कामदारहरु काममा फर्कन नचाहने भएकाले यो प्रावधानलाई लम्बाउन नहुने पक्षमा छन् ।
