एकबर्षमा अमेरिकी सिमाक्षेत्रमा समातिए पौने ५ लाख परिवार, गतबर्षको तुलनामा ३४२ प्रतिशत बृद्धि
प्रकाशित मिति : कार्तिक १३, २०७६ बुधबार
अमेरिकी सरकारले आर्थिक बर्ष २०१९ मा एकबर्षको अवधिमा सिमाक्षेत्रमा समातिने कागजपत्रविहिन परिवारको संख्या सार्वजनिक गरेको छ । एकबर्षको अवधिमा अमेरिकामा कस्टम एण्ड बोर्डर प्रोटेक्सनले झण्डै ४ लाख ७५ हजार कागजपत्रविहिन परिवारका सदस्यलाई पक्राउ गरेको छ ।
गत बर्षको तुलनामा यो संख्या ३४२ प्रतिशतले बढी रहेको छ । अमेरिकामा शरण चाहनेहरुको संख्यामा आएको बृद्धि र शरणमा लगाइएका लगामका कारण सिमाक्षेत्रमा समातिनेहरुको संख्यामा समेत नाटकीय बृद्धि भएको हो ।
आर्थिक बर्ष २०१८ मा दक्षिणी सिमाक्षेत्रमा १ लाख ७ हजार २ सय १२ परिवारका सदस्यहरु समातिएका थिए । तर २०१९ मा ४ लाख ७३ हजार ६८२ परिवारका सदस्यहरु समातिएका छन् । त्यो बाहेक ७६ हजार २० जना अभिभावक विनाका केटाकेटीहरुलाई पनि सिमाक्षेत्रमा पक्राउ गरिएको छ ।
मे महिनामा एक दिनमा मात्र झण्डै २० हजार जनालाई हिराशतमा लिइएको थियो जुन सरकारको क्षमताभन्दा ५ गुणा बढी हो । सिमाक्षेत्रको संख्या संसारको कुनै पनि अध्यागमन प्रणालीले सम्हाल्न नसक्ने खालको रहेको र अमेरिकाका लागि पनि सम्हाल्न नसकिने खालको रहेको सीबीपीका कार्यकारी प्रमुख मार्क मोग्र्यानले जनाएका छन् ।