इन्टरपोलको साधारणसभामा नेपाल प्रहरीका महानिरिक्षक सर्वेन्द्र खनालको सम्बोधन
प्रकाशित मिति : कार्तिक ४, २०७६ सोमबार
नेपाल प्रहरीका महानिरिक्षक सर्वेन्द्र खनालले इन्टरपोलको बार्षिक साधारणसभामा बोल्दै इन्टरपोलको सहयोगमा आतंकवाद, संगठित अपराध र साइबरक्राइमबिरुद्ध लड्नका लागि भएका राष्ट्रिय प्रयासबारे जानकारी दिनुभएको छ । चिलीको सान्टियागोमा असोज २८ देखि कात्तिक १ गते इन्टरपोलको ४ दिने ८८ औं साधारणसभामा केही देशका प्रहरी प्रमुखहरुलाईमात्र बोल्ने मौका दिइएकोमा नेपालका तर्फबाट खनालले बोल्नुभएको थियो ।
चीनका राष्ट्रपतिको भ्रमण सफलताका साथ सम्पन्नपछि खनाल इन्टरपोलको साधारणसभामा भाग लिन जानुभएको थियो । यसै क्रममा प्रहरी महानिरिक्षक सर्वेन्द्र खनालले इन्टरपोलका अध्यक्ष किम जोङ्ग याङ्ग र महासचिव जर्गेन स्टकसँग समेत भेटघाट गर्नुभयो ।
खनालले महासचिव स्टकलाई दोश्रो कार्यकालका लागि नियुक्त भएकोमा बधाई समेत दिनुभयो ।
प्रहरी महानिरीक्षक खनालसँगै केन्द्रीय अनुसन्धान ब्यूरोका प्रमुख प्रहरी नायव महानिरीक्षक निरजबहादुर शाही र प्रहरी प्रधान कार्यालय इन्टरपोल शाखाका प्रमुख प्रहरी वरिष्ठ उपरीक्षक उमेशराज जोशीले समेत साधारणसभामा भाग लिनुभयो ।
प्रहरी महानिरीक्षक सर्वेन्द्र खनालको अनुपस्थितिमा प्रहरी अतिरिक्त महानिरीक्षक पुष्कर कार्कीले प्रहरी प्रधान कार्यालयको दैनिक प्रशासनिक कामकाजको जिम्मेवारी सम्हाल्नुभएको छ ।