४ महिना अगाडि प्राथमिकता मिति भएकाले नोभेम्बरमा एक्स्ट्राअर्डिनरी ग्रिनकार्ड फाइल गर्न पाउने
प्रकाशित मिति : कार्तिक ३, २०७६ आईतबार
एक्स्ट्राअर्डिनरी ग्रिनकार्ड फाइल गर्नेहरुका लागि नोभेम्बर महिना पनि अक्टोबरकै जस्तो अवस्था कायम रहने छ । १ जुलाई २०१९ भन्दा अगाडि एक्स्ट्राअर्डिनरी आवेदन आई १४० फाइल गरेकाहरुले अक्टोबरमा ग्रिनकार्ड आवेदन आई ४८५ समेत फाइल गर्न पाउने भएकोमा नोभेम्बरमा पनि १ जुलाई २०१९ भन्दा अगाडि प्राथमिकता मिति हुनेले फाइल गर्न पाउने भएका छन् ।
सेप्टेम्बरसम्म भने १ अक्टोबर २०१७ भन्दा अगाडिका आवेदकलाईमात्र ग्रिनकार्ड फाइल गर्न दिइएको थियो । तर अक्टोबरमा झण्डै २१ महिना कुनुपर्ने अवधि घटेर ३ महिनामा झरेको थियो । नोेभेम्बरमा पनि त्यही अवस्था नै कायम रहेको छ ।
अब अमेरिकामा नै रहेका आई १४० आवेदन स्वीकृत भइसकेका १ जुलाई २०१९ भन्दा अगाडि प्राथमिकता मिति भएकाहरुले नोभेम्बरमा ग्रिनकार्ड आवेदन दिनसक्ने भएका छन् । उनीहरुले ग्रिनकार्ड नआउँदासम्म वर्क परमिट लिएर काम गर्न वा एड्भान्स परोल लिएर यात्रा गर्नसमेत पाउनेछन् ।
त्यस्तै अमेरिकामा नै रहेका र आई १४० पेन्डिङ अवस्थामा रहेका १ जुलाई २०१९ भन्दा अगाडि प्राथमिकता मिति हुनेहरुले पनि नोभेम्बरमा आई ४८५ ग्रिनकार्ड आवेदन दिनसक्नेछन् । यो आधारमा उनीहरुले वर्क परमिट लिएर काम गर्न र एड्भान्स परोल लिएर यात्रा गर्न समेत सक्नेछन् ।
अमेरिकाबाहिर हुनेहरुका सन्दर्भमा यदि आई १४० आवेदन स्वीकृत भइसकेको छ भने उनीहरुको भिसा प्रकृया नेशनल भिसा सेन्टरले दूतावासमार्फत अगाडि बढाउनेछ । तर आई १४० पेन्डिङ अवस्थामा रहेका र अमेरिकाबाहिर हुनेहरुका लागि भने यसले खासै असर गर्नेछैन ।
खासगरी अमेरिकामा नै रहेका र कानुनी स्टाटस जोगाइराख्ने झन्झटमा परेकाहरुलाई भने अक्टोबरदेखि केही सहज अवस्था आएको थियो । उक्त अवस्था नोभेम्बरमा पनि कायम हुनेछ । यसअगाडि अमेरिकामा भिजिटर भिसामा आएर एक्स्ट्राअर्डिनरी ग्रिनकार्ड फाइल गर्न लगभग असम्भव अवस्था सृजना भएको थियो । तर अहिलेको जस्तो अवस्था कायमै रहेमा अमेरिकामा भिजिटर भिसामा आएर पनि एक्स्ट्रा अर्डिनरी ग्रिनकार्ड फाइल गर्न सम्भव हुनेछ ।
भिजिटर लगायतका गैर आप्रवासी भिसा अमेरिकाबाट फर्कने कुराको ग्यारेन्टी भइसकेपछिमात्र प्रदान गरिने भएकाले सामान्यतया त्यस्तो भिसामा अमेरिका गएको ९० दिनसम्म कुनै पनि आप्रवासी सुविधाका लागि आवेदन दिन नपाइने नियम रहेको छ । नोभेम्बरको जस्तो अवस्था कायम रहेमा भिसाको अवधि थपेर एक्स्ट्रा अर्डिनरी ग्रिनकार्डका लागि आवेदन दिनसकिने अवस्था आउनसक्ने कानुनविदहरु बताउँछन् ।
