Follow @khasokhasmag

आप्रवासीका गतिविधि नियाल्न अमेरिकी अधिकारीलाई फेसबुकले नक्कली खाता बनाउन नदिने


प्रकाशित मिति : भाद्र २०, २०७६ शुक्रबार

अमेरिकी सरकारले आप्रवासीका पृष्ठभूमि परिक्षण र गतिविधिमा निगरानीका लागि सामाजिक सञ्जालमा नक्कली खाताहरु संचालन गर्न पाउने नीति ल्याएपनि फेसबुकले भने आप्रवासीका गतिविधि नियाल्न अमेरिकी अध्यागमन अधिकारीलाई नक्कली खाता बनाउन नदिने स्पष्ट पारेको छ । यदि सरकारका अधिकारीहरुले आप्रवासीका गतिविधि नियाल्न फेसबुकमा नक्कली खाता बनाएमा यो फेसबुकको नीतिको उल्लंघन हुने र नीति उल्लंघन गर्ने फेसबुक एकाउन्टबिरुद्ध कदम चाल्ने फेसबुकले जनाएको छ ।

अमेरिकी सरकारको डिपार्टमेन्ट अफ होमल्याण्ड सेक्युरिटीले नक्कली खाता बनाएर आप्रवासीका गतिविधि नियाल्ने नीति नै ल्याएको हो । ट्वीटरमा पनि नक्कली खाता बनाउनु ट्वीटरको नीति विपरित हुने भएपनि ट्वीटरले भने अमेरिकी सरकारको नीतिबारे सोंचविचार गरिरहेको जनाएको छ ।

शुक्रबार सार्वजनिक गरिएको नीति अनुशार युएससीआईएसले ग्रिनकार्ड, नागरिकता, कामदार भिसा वा अन्य आप्रवासी सुविधाका लागि आवेदन दिनेहरुका सामाजिक सञ्जालहरु निरिक्षण गर्न नक्कली खाताहरु बनाउन सक्ने भएको छ । अधिकारीहरुले आवेदन दिएका व्यक्तिका सुचनाहरु अनुसन्धानका लागि समेत संकलन गर्नसक्ने भएका छन् ।

सम्भावित जालसाजीको अनुसन्धान गर्नका लागि अधिकारीहरुलाई सामाजिक सञ्जालमा नक्कली खाता बनाउने अनुमति दिइएपनि उनीहरुले सार्वजनिक रुपमा प्राप्त जानकारीमात्र संकलन गर्न सक्नेछन् । उनीहरुलाई कुनै पनि व्यक्तिलाई साथी बनाएर, फ्लो गरेर वा सन्देश पठाएर विवरणहरु संकलन गर्ने अनुमति भने हुनेछैन ।

युएससीआईएसले सन् २०१२ देखि अध्यागमन आवेदन रिभ्युका क्रममा सामाजिक सञ्जालको निरिक्षण गर्दै आएको थियो । तर सन् २०१४ मा ल्याइएको एउटा नीतिले अधिकारीहरुलाई सामाजिक सञ्जालमा नक्कली खाता बनाएर आवेदकबारे अनुसन्धान गर्नमा रोक लगाएको थियो ।

सन् २०१७ मा होमल्याण्ड सेक्युरिटीका सेक्रेटरीले युएससीआईएसलाई नक्कली खाताहरु बनाएर आवेदकबारे अनुसन्धान गर्न अनुमति दिएका थिए । शुक्रबार सार्वजनिक गरिएको नीतिले उक्त कुरा कार्यान्वयन भइरहेको विषयमा सर्वसाधारणलाई जानकारी दिएको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com